Grabashon di Junior All Star Orchestra, kantika Ròl di Zoro
Grabashon di Junior All Star Orchestra
Kòrsou 1 di novèmber 2016
Apresiable señores,
Athunto tin un “single”CD, ku grabashon di un número ku e ritmo di Montuno, grabá den studio di Amak na Festival Center, pa hóbennan studiante di Akademia di Músika, Maestro Errol El Toro Colina, i formando parti di Junior All Star Orchestra.
E akademia aki ta kontinuá ku un di su prinsipionan, esta di siña e hóbennan dominá tur género di muzik.
Kontrali na e promé CD, Ban bek na nos rais, e número aki tin un kontenido fuerte, kantá pa un hóben di apénas 11 aña, señalando situashonnan no korekto den nos komunidat.
E meta di e instituto aki ta pa krea músikonan di nivel, ku ta bira siudadanonan konsiente i ehemplar, ku por bosiferá nan opinion ora esaki ta nesesario.
Ta bon pa menshoná ku eksepshon di e parti di brass, ta e hóbennan a graba tur instrumènt den un tempu hopi rasonabel.
Athunto un lista di esnan ku a graba den studio.
Nos ta hasi un apelashon riba boso empresa, pa duna e promoshon nesesario na e “ single” CD aki.
Nos ta gradisí di antemano.
Na nòmber di Tim di maneho
Manfred Feko Gomes
Ròl di Zoro
Mal uso di poder t’okashoná
Un aktitut deskabeyá
Engaño intriga i falsedat
ingredientenan di maldat
Tur tempu nan a disfrutá
Na nan antoho a probechá
Salbaguardiá benefisio personal
sin tene kuenta ku interes general
Lei di karma por afektá
Tur esnan k’ a mal manehá
A yega ‘n fin na e tèmp’i oro
Pa terminá ku e ròl di zoro 2x
Pueblo ta sklama pa terminá pone un fin n’e ròl di zoro
Si mal uso di poder ser konstatá
Hiba un maneho responsabel
E set pa poder mester yega na su fin
Si e sapatu ta sirbibu
Bo tin, bo tin, bo tin ku bistié
Lei di karma por afektá, pesnan kulpabel ser kastigá
Ròl di zoro ta intriga
Ta falsedat
Ta engaño
E maldat
Ban kaba ku n’e
Basora ke n e
A yega na un fin
Pa regla pastechi
Tin hende ke bira rei nan ’n por 2 x
Ban respetá nos bandera, keda ku dos pia riba tera
Letra i melodia: Manfred Feko Gomes
Areglo: Gedion Chandler
Kanto: Ashton Garcia
Muzik: Jnnior All Star Orchestra
M.J.Gomes 8 di òktober 2016
