KORPS POLITIE ARUBA: VISIBILITY TEAM TA PROMOVE SIGURIDAD DEN CENTRO DI ORANJESTAD ARUBA

​Visibility Team ta promove siguridad den centro di Oranjestad
Visibility Team den e districto di Oranjestad ta vigila e situacion den centro di Oranjestad continuamente, haciendo nan maximo esfuerso pa preveni crimen y peligernan den e area. Algun di e posibel retonan y peligernan ta wordo identifica pa e empleadonan den Playa kende ta comparti nan observacionnan cu Polis. Cu un bon “follow up”, Visibility Team Oranjestad ta logra evita crimen y peligernan potencial.
Visibility Team tambe ta activo na actividadnan, incluyendo por ehempel shownan cultural manera esun cu a tuma luga riba dia 31 di october na waf. Aruba Tourism Authority a organisa e actividad aki pa pasaheronan yegando riba barconan crucero. Visibility Team a percura pa, entre otro e adictonan ambulante no molestia e bishitantenan y stroba e evento. E molester mas grandi cu ta experencia den e bisindario aki ta e presencia di “landlopers” y adictonan ambulante cu ta stroba turistanan y personal di e tiendanan. Den bisindario di e bushalte principal a topa cu “Lloyd” kende sa causa retonan den centro, y a pidi’e pa e move for di e area.
Dia 1 di november miembronan di e team a para un auto di cual nan a sospecha cu e chauffeur lo por ta operando un servicio di “taxi pirata”. E chauffeur no tabatin ningun documento di e auto tampoco, el a bira grosero cu Polis y hasta a expresa menasa den nan direccion. Polis a atende riba su expresionnan y a bis’e cu nan por detene pa loke el a bisa, consecuentemente e chauffeur a mustra comprension y a pidi despensa.
Riba dia 2 di november Polisnan tabatin un otro encuentro cu “Lloyd”, kende tabata molestiando turistanan den cercania di Valero Boulevard. Considerando con druk tabata eybanda y teniendo cuenta cu e siguridad di e turistanan, polisnan a dun’e un “cabe’i boto” pa cas di su tanta.
E mesun dia a bin dilanti un otro caso mas di molester, unda cu Polisnan a wordo acerca pa personal di e tiendanan Totto, Dufry, Victoria’s Secret, Sagar y PitoKito, kende tur a keha cu pa algun dia caba tin un homber desconoci cu ta para keto dilanti di porta di e negoshi y ta keda wak nan cu un mirada di “gana”.

Visibility Team a topa banda di Penha cu e homber “G” kende ta “match” e descripcion cu nan a haya di e personal di e otro tiendanan. A atende cun’e tocante di su comportacion y el a expresa comprension y a priminti di no lo causa mas molester. E dia siguiente Polisnan a topa cu e “landloper” di nomber “R” kende tabata molestia turistanan banda di Royal Plaza y a exigi’e pa e bay di e area despues di papia cun’e tocante di su comportacion.
Mas laat e mesun dia tabatin keho di Ricuras Coffee Delight, unda cu e “landloper” cu nomber “F” a cana drenta y tabata molestiando e clientenan. E homber cu a acerca polis a declara cu no tabata prome biaha. Aunke polisnan a busca “F” den Caya Betico Croes pa atende cun’e, nan no a logra topa cun’e.

Riba dia 4 di november, Visibility Team a patruya riba pia pa un gran parti di e dia rond di e entrada di waf y den e bisindario di e kiosconan, te den e area di Eetcafe De Paddock, como cu tabatin e barco Island Princess den waf, cu mas of menos 3000 pasahero. A patruya extra den e resto di e centro di Oranjestad den forma preventivo.