Djasabra awor ultimo chèns pa kumpli ku areglo di pago i paga but habri !

Djasabra awor ultimo chèns pa kumpli ku areglo di pago i paga but habri !

Ministerio Públiko a anunsiá e siman aki ku 80 % di e 5.000 siudadanonan ku un areglo di pago na ofisina di Paga Bo But no ta kumpliendo ku esaki. OM a a bisa na e okashon aki ku ta bai para tur areglo di pago di esnan ku no ta kumpliendo. Esei tin komo konsekuensia ku ta para e areglo di pago inmediato ku e resultado ku e but ta bira pa OM direktamente eksigibel. Falta ku kumplimentu ta nifiká tambe ku e but ta sigui oumentá.

Debí na e anunsiá a resultá hopi drùk na ofisina di Paga Bo But. Hopi siudadano a akudí einan pa regla nan debe i/òf nan areglo di pago.

Ministerio Públiko a disidí pa habri su portanan djasabra awor, dia 12 di novèmber, pa asina duna siudadanonan oportunidat pa bin kumpli ku nan deber. E ofisina di Paga Bo But riba Abraham Chumaceiro Boulevard 11 na Waaigat lo ta habri di 9 or mainta te 12 or di mèrdia.

Ministerio Públiko ta hasi un yamada urgente na tur esnan ku un areglo di pago ku a vense, pa bin kumpli ku esaki djasabra awor. Despues di 15 di novèmber, konforme klóusula di but, ta bai oumentá butnan habri i lo para tur areglo di pago ku e siudadano no ta kumpliendo kuné.

Evitá problema, paga bo but !

Paga Bo But Curaçao/Boetebetaling Curaçao Abraham Mendez Chumaceiro Boulevard 11, Waaigat, Willemstad, Curaçao