Ban brasa Carifta Games i hunga un papel firme!

Ban brasa Carifta Games i hunga un papel firme!
Kòrsou ta forma parti di reino ulandes, pero kasi no tin masha di haber ku su paisnan bisiña. Kòrsou en realidat ta situá na 8742 kilometer di distansia for di su kolonisadó Ulanda, anto hasiendo uzo di un buelo dirèkt ta dura 9 ora i 35 minüt pa yega Ulanda. Hopi tempu nos a biba ku e persepshon ku Kòrsou ta muchu mas avansá i mas desaroyá ku otro islanan den Karibe. E tipo di pensamentunan ei tabata sostené riba ekspreshon i e komportashon di funshonarionan ulandes europeo prominente, pero tambe tabata keda konfirmá den nos pueblo por ehèmpel pa e forma kon Kòrsou sa derotá paisnan ku muchu mas habitante ku nos den kompetensianan di futbòl. Tabata sosodé ku resultadonan aplastante, nos sa sali triunfá riba paisnan manera Venezuela, Santo Domingo, Puerto Rico, Cuba i tabata asina ku vários di e otro pueblonan den Karibe simplemente no por a kompetí ku e onsena di Kòrsou of di Antia Ulandes. Pero Kòrsou entre tantu a kai enormemente atras. Ademas ta asina ku e paisnan menshoná ya a subi nan nivel i kalidat di futbòl, siendo nos a sigui biba den pasado ku sintimentunan di superioridat. Remarkabel ta tambe ku na sierto reunionnan den nos region ántes nos hendenan por a resaltá debí na dominio debido di e idiomanan ingles, spañó i franses huntu. Pero nos enseñansa aktualmente tampoko no ta produsí resultadonan satisfaktorio, miéntras Kòrsou riba su mes no ta floresé manera ántes ku ganamentu di wama na Nieuwpoort, refineria SHELL, offshore etcetera, pero ta asina ei nos isla por a lusi mas ku e otro islanan bisiña. Nos mag tin aspirashon haltu, pero mester aseptá e realidat ku nos ta parti di Karibe, komo tal e sirkunstansia real aki ta rekerí pa nos midi nos kultura, arte, músika, siensia, historia ku paisnan bisiña.  

Resientemente Kòrsou a lobi ku éksito pa bira anfitrion di e di 46 edishon di Carifta Games na aprel 2017. Pa por manehá e evento aki mas profeshonal posibel a disidí ku ta lanta un fundashon ku ta enkargá ku e gran evento aki i ta buskando voluntario pa duna un man. Kiko ta Carifta Games? Awèl, Carifta Games ta kompetensia i klasifikashon den e ramo di atletismo entre atletanan di vários pais den region di Karibe. Sigur un 26 pais partisipante e kompetensianan aki lo konosé, variando di paisnan grandi manera Jamaica te esnan mas chikitu manera Boneiru etcetera. Pa kuminsá Kòrsou komo anfitrion di un evento di asina renombre, sin duda ta pone su mes den e posishon di eksperenshá un grado organisatorio haltu pa loke ta trata eventonan deportivo. Maske weganan olímpiko ta riba un eskala muchu mas grandi, pasobra ta na nivel mundial, no tin duda Carifta Games tambe ta trese kuné un preparashon bastante intensivo i lógikamente ta rekerí strukturanan kompleho ya ku ta trata di sentenáres di partisipante di den Karibe. Carifta Games a desaroyá i alkansá strukturanan stándart ku tur pais organisadó mester tene nan mes na dje. E transmishonnan di radio i televishon ku ta tuma lugá finalmente ta alkansá miónes di suidadano den Karibe i muchu mas ku esei, esta te na Europa i Merka. Pa Kòrsou lógikamente ta nifiká e oportunidat di oro pa bria, basta nos logra hasi e evento aki di e forma i di e kalidat haltu ku ta spera di nos. E magnitut enorme di un evento manera Carifta Games apsolutamente no ta di balotá, pasobra e tin mas di 44 aña ta tumando lugá kaba, anto den transkurso di tur e añanan a desaroyá un nivel ku debidamente ta akapará tur aspekto komplementario ku ta kompañá e gran evento aki. No únikamente ta duna tur balor i importansia na e lokalidat kaminda e weganan di Karibe aki ta tuma lugá, sino tambe na planifikashon organisatorio, hospitalidat, servisio, fasilidat i kondishonnan bou di kua Carifta Games den su totalidat ta bini padilanti. Kòrsou na mi pareser mester sòru di kumpli ku tur e eksigensianan rekerí, anto alabes traha nòmber, demostrando ku nos ta un di e sitionan apropiá pa un gran evento asina ‘ki. Si tur instansia konserní hala mara, nos lo tin pa promé biaha míles di turista di Karibe en bloc ku lo ta na Kòrsou pa presensiá Carifta Games 2017.  
Danki di antemano
Erwin Raphaela