FNP ta wak bèk riba un promé mitar di Global Entrepreneurship Week sumamente eksitoso

FNP ta wak bèk riba un promé mitar di Global Entrepreneurship Week sumamente eksitoso

WILLEMSTAD – E siman aki 165 pais rònt mundu, ku ta afiliá na Global Entrepreneurs Network (GEN), simultáneamente ta selebrá un siman di empresario. Na Kòrsou tambe esaki ta e kaso. Ya for di aña pasá Fundashon Negoshi Pikiña (FNP) a haña lisensia di GEN pa organisá Global Entrepreneurship Week na nos isla. Kada pais por usa su propio kreatividat pa duna kontenido pa selebrá e siman di ‘entrepreneurship’. E promé parti di siman ta tras di lomba i FNP ta wak ku hopi satisfakshon kon e promé parti di Global Entrepreneurship Week a bai.
E siman a habri ku un aktivdat pa invitado na Banko Sentral di Kòrsou i Sint Maarten. Despues ku presidente di GEW i FNP, sra. Elgenia Pieternella a habri e anochi ku un diskurso elokuente, Minister pa Desaroyo Ekonómiko, Eugene Ruggenaath, a elaborá riba e importansia di plataformanan manera GEW pa stimulá mas empresa i ideanan di negoshi nobo na Kòrsou. E programa a kontinuá ku un diskurso di sra. Thaninga Shope-Linney, kende ta embahador pa Sur Afrika na nos paisnan bisiña Colombia i Venezuela. Sra. Shope-Linney, kende ta un invitado di GEW Curaçao tabata kompañá pa su esposo kende ta embahador di Guinnea. Ámbos, ku ta pa promé biaha a pisa suela di Kòrsou, e bisa di a keda sumamnte impreshoná ku nos isla. Sra. Shope-Linney den su diskurso entre otro a mustra riba e importansia pa e diáspora Afrikano den Karibe redeskubrí e kontinente Afrikano, i eksplorá kulturanan i posibilidatnan mutuo di negoshi. Den e parti final di e anochi esnan presente tabatin posibilidat di interkambiá idea i ekspandé ret di kontakto.
Pa djamars den dia e tim di profeshonal ku a pone nan kouder bou di Global Entrepreneurship Week a hinka un programa hopi interesante den otro. E aktividatnan aki tambe a tuma lugá na Banko Sentral di Kòrsou i Sint Maarten. Tabatin 4 workshop riba programa di kua por bisa ku tur tabata masha bon bishitá. Den e parti di mèrdia a tene e highlight di e siman ku tabata un almuerzo ku un charla spesial di oradó invitá Jeff Hoffman. Den e ilustre empresario aki su kuríkulo ta resaltá ku e.o. otro el a krea kompanianan manera Priceline.com, uBid.com, Booking.com i otro kompanianan mundialmente konosí. Sr. Hoffman pa varios aña ta konsehero di Kas Blanku i State Department di Estádos Unídos pa programanan pa stimulá mundu empresarial na Merka i pafó di Merka. E ta un embahador pa Nashonnan Uní i un di e direktornan di Global Entrepreneurs Network. Den su iskurso el a duna hopi konseho i tep valioso na empresarionan presente. Sr. Hoffman manera el a terminá su diskurso a biaha rumbo pa Mexico kaminda e ta invitado di Minister di Ekonomia di e pais. Einan e lo tene diskurso huntu ku otro luminarionan di mundu di negoshi manera Richard Branson di Virgin. E kuater workshopnan tabata na enkargo di Sr. Lisandro Inacio, kende a elaborá riba e importansia di kuminsá i desaroyá negoshinan saliendo for e yamada di nos kreador. E di dos workshop tabata na enkargo di Sra. Rochelle Monte i Sra. Sumaya Elhage di ‘Curaçao Development Institute’ i e programa di ‘Business Boost’. Sra. Elhage a informá esnan presente kon CDI por ta di asistensia pa desaroyo di empresanan i sra. Monte na su turno a duna hopi tep kon pa hasi negoshi di un forma efisiente i eksitoso. E parti di tra’i mèrdia di e workshopnan tabata na enkargo di sr. Dennis Dare di Kámara di Komèrsio i sr. Tom Kok, kende tin un karera impreshonante komo dirigente na Hulanda i Kòrsou i ku akalmente ta komisario di Banko Sentral di Kòrsou i Sint Maarten. E bishitantenan a keda sumamente enkantá i satisfecho ku e informashon ku nan a risibí riba e dia.
A kòrta e siman empresarial na mitar ku un aktividat den sala di ekshibishon di WTC, kaminda a reuní alrededor di 1000 hóben di algun skol di fundeshi ku durante 3 aña a partisipá na e proyekto empresarial’Nos Komunidat’ di Fundashon Negoshi Pikiña (FNP). E hóbennan a risibí un sertifikadó firmá pa FNP i Junior Achievement International. E programa edukativo en kuestion a ser ehekutá pa e organisashon Caribbean Education and Financial Services. Bal la pena hasi menshon ku algun mayor a ser prepará pa di un forma boluntario duna sierto partinan di e programa edukativo aki na muchanan na skol.
Mas lat den oranan di atardi a kontinuá ku e programa ku asina yamá Pitch Competition ku a tuma lugá na Creative Lab na Skarlo Abou. E Pitch Competition ta un plataforma den kua studiantenan di skolnan sekundario ta haña oportunidat pa ekshibí e mihó proyektonan di Mini Empresa. E ta alabes un kompetensia di e mihó idenan i ehekushon empresarial. E evento aki ta kulminashon di e parti di preparashon empresarial ku Fundashon Negoshi Pikiña, huntu ku algun stakeholder, ta realisá na skolnan sekundario i avansá. Pa realisashon di e parti aki di e proyekto FNP a konta ku kolaborashon di profeshonalnan hóben di e organisashon Ekonomen Platform.
Tur e aktividat tabata muestra palpabel ku ora organisashon uni forsa riba nos isla, nos por logra kosnan sumamente bunita i positivo na bienestar di nos komunidat.
Djaweps i djabièrné representantenan di FNP ta huéspet na hermana isla Boneiru kaminda pa promé biaha ta organisá Global Entrepreneurship Week. Pa djasabra FNP lo ta full den akshon un baiha mas na Kòrsou kaminda e organisashon partner ‘I Am Made Curaçao ta bai tene un eksibishon hopi diversifiká di produskhon lokal. E evento aki lo tuma lugá di 4 or pa 7 or na Marshe na Punda. Entrada ta grátis i ta hasi un yamada na komunidat pa bin será konosí ku diferente kompania lokal i nan produkshon.
Pa mas informashon bishitá e website di gewcuracao.com òf e pagina di Facebook di Global Entrepreneurship Curaçao.