Mester di lidernan ku wes’i lomba pa salba e pais aki.

Mester di lidernan ku wes’i lomba pa salba e pais aki.

Pa por sirbi bienestar di nos pais, Kòrsou su estilo di hiba polítika i gobernashon riba un base simpel i kasi sin kompromiso no por kontinuá! Pa kuminsá no por ta pasobra esun ta forma parti di oposishon, nada di gobièrnu no ta bon i no meresé sosten, anto vise vèrsá nada di oposishon no meresé aprobashon tampoko. Pa kolmo e mesun tendensia aki ta bini bèk den prensa i serka medionan di komunikashon ku na su turno ta sigui krese e aktitut i komportashon dañino aki den pueblo. Enfin nos pais di e forma aki klaramente ta bayendo den e direkshon di un pais sumamente problemátiko, den kua no tin desaroyo, ni ningun klase di adelanto. Al kontrali desgustu, pobresa i krímen ta asotá nos di tur banda i ta kreando desesperashon den pueblo. Hóbennan ta lanta buskando un bida den e negoshi di droga i no ta prekupá at all pa duna bon prestashon na skol, siendo ainda tin un kantidat grandi di hóben ku ta hasi tur esfuerso pa studia i alkansá un diploma, pero finalmente tòg ta keda sin trabou. Remarkabel i prinsipalmente kontradiktorio ta e situashon di muchanan ku nunka no a presta na skol, no a hasi ningun tiki esfuerso, pero direpente ta resultá doñonan di vehíkulonan luho, kasnan grandi estilo ‘manshon’, sumamente kostoso etcetera. Nan a drenta droga, tira pará, anto asina ei a keda ku sumanan grandi di plaka. Prinsipalmente e sirkunstansia aktual ku no ta brinda un futuro sano pa e pueblo aki ta kousa ku muchanan hóben ta buska nan rekurso den narkotrafikashon. Den paisnan mas grandi nos a mira e konsekuensianan teribel kaminda ‘Big Bossnan’ ta logra ehersé influensia  den aparato públiko, den e kadena mas haltu di hustisia etcetera, korumpiendo funshonario i of outoridatnan grandi. Kòrsou su gobernashon defisiente klaramente ta kondusí na e situashonnan manera ariba deskribí. E fluho di hóbennan ku ta kai den gara di outoridatnan pa nan intento pa eksportá droga, klaramente ta demostrá tendensianan eksplosivo. Prizon i sèlnan na Kòrsou ta yen i pió ainda ta e kasonan di likidashon kruel ku frekuensia a bin ta sosodé komo si fuera na órden del dia. E konsekuensianan di mal gobernashon ta inmensamente grandi pa nos komunidat. Pa kuminsá gobernantenan ku ta insistí ku ta e parti finansiero so ta importante i no e situashon di e suidadanonan en general, ta hiba e pais na bordo di un spiral di krímen haltu i un dekadensia intragabel. Suidadanonan ta lanta ku sintimentu di rabia, pa e inhustisia ku nan ta biba den aña aden aña afó. Ningun hende no ta dispuesto pa biba hinter su bida den pobresa i sufrimentu, sin ni sikiera e perspektiva di kambio. Tur ta anhelá un entrada na drechi i no ke ta konstantemente den pèrtá finansiero kousá pa problemanan serio pa tene kabes riba awa. Drenta e negoshi di droga, manera mas i mas suidadanonan ta hasiendo na Kòrsou, sin duda ta kousa dañonan teribel den e pueblo. Droga pa kuminsá ta krea adikshon i esaki na su turno ta bai kompañá ku molèster den forma di ladronisia okashoná pa adiktonan ku ta bula den kasnan den bario, skolnan, misa, negoshinan etcetera. Ainda mas teribel ta lantamentu di bandanan kriminal ku ta operá den un sirkuito sumamente peligroso pa kita droga for di otro. E situashon aki finalmente ta resultá den likidashonnan sumamente kruel ku armanan sofistiká. Kòrsou di e manera aki kada dia ta bira mas peligroso i ta sigui bai patras. Enfin, nos pais no ta sirbí ku gobernantenan ku no por enkaminá retonan importante ku por hiba e pais aki den desaroyo ku ta kondusí na realisashon di plan i of proyektonan ku ta hiba e pais aki padilanti. E tipo di gobernante ku Kòrsou ta rekerí aktualmente ta esnan ku por yega sinta den driver-seat i hasi e trabou i no esnan ku ta desplegá e mentalidat di un par di kangreu ku ta hala otro bai abou kuné, buska broyo i bòmbòshi pa benta den laira. E kultura di konflikto ku ta resultá den bati otro su kabes aden en bes di produsí na benefisio di e pais su generashonnan nobo, ta e aktitut kanseroso ku ta likidando Kòrsou.
 Erwin Raphaëla

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: