Yegada di Nos Miss Teen Americas 2023 Suenthely Henriette.

Awe a regresa Kòrsou, srta. Suenthely Henriette, Miss Teen Americas Curaçao 2023, ku a ser premia den Top 8 entre 18 partisipante durante sertámen Miss Teen Americas International 2023 djasabra 29 di yüli ultimo na San Salvador.

Na su yegada na aeropuerto Suenthely, huntu ku srta. Kimberly Acosta Miss Teen Americas International 2022 i direktor di CICQ Gionel Virginie a wòrdu risibi pa sr. Minister Ruisandro Cijntje, enkarga ku Desaroyo Ekonomiko i Turismo.

Despues a sigui ku un lunch ofrese pa gerensia di Restaurant Gondola i mas atardi un rueda di prensa i agasago  pa Suenthely den kompania di mayor, famia i demás invitadonan  na 7.1 Experience Gallery & Atelier by Giovanny Abath.

CICQ ta felisita Suenthely i ta gradisiele pa su esfuerzo i trabou. Ku su sonrisa, karisma i kurason humilde ela konkista kurason di e demás partispantenan i tur persona ku ela topa na San Salvador.

Suenthely a bria i asina a logra di a ser premia den Top 8.

Suenthely for di e prome aktividat a sabi di hala atenshon di mundo henter i siguidonan di sertámen engeneral i en partikular di Miss Teen Americas International by Francisco Cortez.

Suenthely a representa e identidat di e kurasoleño ku tin rasgo di e promé habitante nan indian arowak ku a sigui meskla ku desendientenan di medio oriente i oksidente, meskos ku tur habitante di kada país  ku ta forma kontinente Amerikano inkluso Karibe.

CICQ ta mas ku orguyoso di Suenthely su presentashon na Miss Teen Americas International 2023.

Durante di e anochi final srta. Kimberly Acosta a klousura su reinado komo Miss Teen Americas Internatonal 2022 i a korona representante di Peru komo su susesora.

CICQ ta gradisi Kimberly tambe pa su dedikashon durante di su aña di reinado.