MEO TA HASI INVENTARISASHON DI ‘STANDPLAATS’ NAN NA KÒRSOU.

Willemstad- Den kuadro di optimalisashon di e sistema di informashon interno, Ministerio di Desaroyo Ekonómiko (MEO) ta bai kuminsá ku un trayekto di inventarisashon di tur ‘standplaats’ na Kòrsou entrante e promé siman di Ougùstùs. E inventarisashon akí ta konta pa tur ‘standplaats’ tantu esnan ubiká den sentro di siudat komo esnan pafó di sentro di siudat i meskos pa ‘standplaats’nan ku ta operá durante di oranan di dia komo esnan ku ta habri anochi. Un ‘standplaats’ ta enserá entre otro esnan ku tin pèrmit pa un trùk di pan òf trùk di batido, pero tambe por ehèmpel esnan ku tin un mesa òf stènt den áreanan públiko pa benta di piská i fruta.

E tim di inspekshon ekonómiko lo ehekutá e inventarisashon akí den e periodo benidero dor di bishitá kada ‘standplaats’ personalmente. E koleganan di inspekshon ekonómiko ta identifiká nan mes na yegada i lo hasi diferente pregunta na e propietario tokante e ‘standplaats’. Si pa un òf otro motibu bálido e propietario mes no (por) tei presente durante e inventarisashon, mester tin un persona responsabel pa e negoshi i ku ta disponé òf tin akseso na e informashonnan nesesario pa nos inspektornan. Kada propietario di un ‘standplaats’ mester sòru pa tur dokumento di e ‘standplaats’ i di e propietario mes ta na òrdu i mester tin esakinan durante e inventarisashon pa asina e proseso por kana muchu mas lihé.

Na aña 2018 MEO a hasi e promé inventarisashon di ‘standplaats’. Sinembargo, e ministerio a tuma nota ku durante e periodo despues di e promé inventarisashon akí, tabatin diferente propietario di ‘standplaats’ ku a stòp ku nan negoshi debí na entre otro e situashon di COVID-19, pero tambe tabatin ‘standplaats’ nan nobo ku a habri i otronan eksistente ku a kambia di lokalidat. Mirando esaki, ta sumamente importante pa bolbe inventarisá di moda ku e sistema di informashon interno por keda aktualisá. E informashon akí ta importante pa MEO por sigui implementá, evaluá i adaptá e maneho aktual pa ‘standplaats’.

Pa kualke pregunta òf informashon tokante e inventarisashon aki por tuma kontakto ku nos via nos number di kontakto ku ta 462-1444 durante oranan di ofisina.