Alto Comisario di Polis,  mr. Dolfi Richardson: “Fusion Center” ta un instrumento valioso pa combati criminalidad

ORANJESTAD ARUBA
Alto Comisario di Polis,  mr. Dolfi Richardson: “Fusion Center” ta un instrumento valioso pa combati criminalidad

Nucleo di investigacion y intercambio di informacion den husticia
Informacion ta e instrumento mas valioso den cualkier investigacion y e analisis di datonan adkiri ta un parti esencial den e proceso pa resolve crimen. Pa facilita e analisis y adkisicion di datonan, un grupo di partner, un nucleo cu ta consisti di actornan di nivel halto den e cadena di husticia, a uni recientemente den “Fusion Center”. E acuerdo entre e partidonan aki a keda estableci siman pasa.
Alto Comisario di Cuerpo Policial Aruba, mr. Adolfo “Dolfi” Richardson a laga sa cu Fusion Center ta un instrumento valioso pa combati crimen. El a splica cu ya algun aña pasa a cuminsa traha riba e grupo aki como cu e ta un di e puntonan di maneho di Minister di Husticia, Arthur Dowers. E proceso, cu tabata encabesa pa e anterior fiscal mayor a tranca ora a yega na e discusion huridico. A keda bay bek den reunionnan di planning, y a logra porfin un construccion cu tur partido ta considera “werkbaar”, o sea cu e por funciona.
Alto Comisario Richardson a expresa cu e ta hopi contento cu a logra establece Fusion Center. Cuerpo di Polis ta e unico instancia cu mag di tin informacion riba hende y organisacionnan, pero e maneho ta keda den man di Ministerio Publico, y ta nan ta duna e autorisacion pa e informacion compila wordo uza den Corte.
E topiconan cu mester of ta haya atencion di Fusion Center ta wordo determina durante di e reunion mensual di un comision. E comision ta consisti di tur hefe di e departamentonan concerni.
Tin un grupo nucleo, manera Richardson a splica, pero e construccion di e organisacion ta laga e espacio pa inclui miembronan pa un periodo of proyecto, dependiendo di e necesidad di e investigacion. Lo acerca otro departamentonan pa uni na e grupo ora ta trata di temanan cu nan ta specialisa den dje of informacion cu nan tin acceso mas facil na dje of tin e experticio pa analisa.
Alto Comisario Richardson ta agrega cu ya prome cu e firma e acuerdo oficial e grupo a cuminsa cu analisis di cierto datonan y e colaboracion a bay bon. Cu e atake di riba 9-11 paisnan rond mundo a realisa e importancia di pone mas atencion riba informacion y analisis di informacion y Fusion Center ta un di e instrument pa cumpli cu e necesidad na Aruba. E hefe di polis a conclui bisando cu e tin tur confiansa cu lo tin adelanto den combatimento di crimen cu e uzo di e capacidadnan di Fusion Center

fb_img_1479930259467

fb_img_1479930262767

fb_img_1479930266696

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: