Trahadó di e kompania di seguridat ku ta wak e vehikulonan den kurá mes ta hòrta piesa di vehikulonan

​Trahadó di e kompania di seguridat ku ta wak e vehikulonan den kurá mes ta hòrta piesa di vehikulonan

Un suidadano a keda konfrontá ku un kaso insólito pa motibu ku su vehikulo a keda transportá pa kurá di HCCC.
Durante di un kontrol di trafiko, vehikulo di e suidadano en kuestion a keda transportá pa kurá di HCCC pa motibu ku papelnan di e vehikulo no tabata na òrdu. Komo ku tabata durante fin di siman, mester a warda djaluna pa kaba di regla e dokumentunan nesesario. 
Na momentu ku e suidadano a yega kurá di HCCC pa tuma su vehikulo el a nota ku su vehikulo, un Toyota Yaris, no tabata den e mesun kondishon ku e tabata. 
Furu di porta tabata kitá i su spilnan parti pafò a keda remplasá pa spilnan bieu. 
Na momentu ku e suidadano a bai atendé ku e kompania di seguridat, a dun’é di konosé ku lo bai wak e video di vigilansia. E vehikulo tabata pará dilanti pues por tabata tin bista riba dje sin difikultat.
Na warda di polis, ora a bai entregá keho di ladronisia, a duna e suidadano di konosé ku e mes tin ku sigui atendé ku e kompania di seguridat. 
For di imagennan di e video di seguridat a resultá ku ta e trahadó ku tabata na warda mes a hasi su mes kulpabel di ladronisia na e vehikulo. E trahadó tin mes un tipo di vehikulo ku e suidadano. 
E suidadano a haña 2 otro spil, model mas bieu. Alabes e kompania di seguridat a indiká ku tin un bòrchi ku ta indiká ku no ta para responsabel pa niun vehikulo riba e tereno. 
E trahadó di seguridat a keda kitá for di trabou. Polis no ta atendé ku e kaso di ladronisia. E kompania di seguridat no ta para responsabel.

********************

Durante un kontrol di trafiko, agente polisial ta kita vehikulo di un suidadano ku ta duna rijles bou di preteksto ku Keuringskaart di e vehikulo no tabata na òrdu. Sinembargo e Keuringskaart ta balido te novèmber 2017. E agente polisial a keda bisa ku e papelnan no tabata na òrdu i a transportá e vehikulo pa kurá di HCCC. 
Pa e suidadano aki, duna rijles ta generá entrada pa mantené su famia. E mester a para mira kon ta transportá su vehikulo sin motibu pa kurá mientras ku tur papel di e vehikulo tabata na òrdu.