Partido MAN a tuma nota di bastante diskushon ku a lanta den komunidat I medionan sosial riba e posishon ku frakshon di MAN

Partido MAN a tuma nota di bastante diskushon ku a lanta den komunidat I medionan sosial riba e posishon ku frakshon di MAN a tuma den reunion di Parlamento dia 6 di desèmber 2016 relashoná ku e studio di Bachelor Policing
Den e reunion di dia 6 di desèmber 2016 frakshon di MAN a bai di akuerdo ku un moshon den kua a pidi pa Minister di Hustisia sr. Navarro pa promé ku presentá e proyekto den Justitieel Vierlanden Overleg (JVO) ku lo tuma lugá riba dianan 8 i 9 di yanüari 2017, pa manda e dossier kompletu pa parlamento tuma nota di hinter e proseso. Partido MAN ke dispone di tur dokumentashon i informashon ku tin pa por tuma un posishon final di un forma responsabel i disididu.
Ta bon pa enfatisá ku kontrali na e persepshon ku tin serka algun persona, den e reunion públiko di dia 6 di desèmber no a tuma e desishon pa otorgá e trabou na ICUC international B.V. E desishon ei tabata tuma kaba. Dia 7 di desèmber miembronan di parlamento di partido MAN a entrega un karta na minister di Hustisia den kua nos ta pidi minister pa a base di e moshon ku a keda aprobá den e reunion públiko di dia 6 di desèmber, manda e dossier kompletu pa Parlamento pa mas tarda djabièrnè di 9 di desèmber 2016, konsiderando e urgensia i tambe pa kaba di atendé e asuntu aki na un manera rápido i debido i asina trese klaridat… .
Alabes parlamentario nan di MAN a urgi sr. Minister pa manda e dossier kompletu pa Kontrolaria General di Kòrsou pa un evaluashon riba “doelmatigheid i rechtmatigheid” di e proseso ku a keda hiba. Despues di studia e dokumentonan i tambe risibí resultado di investigashon hasi pa Kontrolaria General (Algemene Rekenkamer Curaçao), frakshon di MAN i partido MAN lo asumí su posishon final den e kaso aki di un forma responsabel, konforme nos ideologia i prinsipionan.
Partido MAN ta reiterá ku MAN ta para pa bon gobernashon, transparensia, kontrol i kombatí korupshon i lo no desviá for di esei. Nos a hiba un kampana fuerte basa riba entre otro e prinsipionan ei.

PARTIDO MAN SEPT 2016

This site uses Akismet to reduce spam. Learn how your comment data is processed.

error: Content is protected !!
%d bloggers like this: