Carifta Games, promé reto grandi pa Kòrsou den aña 2017.

Carifta Games, promé reto grandi pa Kòrsou den aña 2017.

Apresiabel lektor, sea asina bon di kompartí e pensamentunan aki ku mas suidadano!
Rumannan, si nos pais logra kombiná forsa ku eksperensia i trese nos hendenan ku kapasidat organisatorio haltu huntu, Carifta Games na luna di aprel di aña 2017 lo zona kampanaso i lanta sentido di orguyo di nos pueblo. No ta pòrnada Kòrsou a lobi i finalmente logra ku nos ta bira anfitrion pa e espektakular evento aki, konsiderá e weganan olímpiko di Karibe. For di aña 1972 Carifta Games ta tuma lugá tur aña di nobo i ta un evento di renombre i en realidat sumamente prestigioso. Ounke ta trata di weganan di Karibe, e modelo i struktura organisatorio ta en prinsipio komparabel ku weganan olímpiko mundial. E islanan di Karibe huntu tin na kantidat 43.600.000 habitante. Cuba ta e isla mas poblá ku 11.000.000 suidadano, siguí pa Haiti i Repúblika Dominikano ku kasi e mesun kantidat di suidadano esta 10.8 mion na Haiti i 10.6 mion na Repúblika Dominikana. Carifta Games a originá den Karibe serka e islanan di abla ingles, esta Jamaica, Trinidad & Tobago, Bahamas, pero despues a djòin esnan franses manera Haiti, Guadeloupe, Martinique, siguí pa nos di orígen ulandes esta Curacao, Aruba, Boneiru, Sint Maarten etcetera. Falta ainda pa Cuba, Repúblika Dominikana i Puerto Rico tambe bira partisipantenan aktivo den Carifta Games. Segun informenan konfirmá ta hasiendo e trámitenan nesesario pa pronto Cuba, Repúblika Dominikana i Puerto Rico tambe ta partisipantenan aktivo den e prestigioso evento aki. Na momento ku esaki sosodé Carifta Games ta krese bira muchu mas grandi i kompetitivo, ounke e prestigioso evento aki ya a produsí atletanan di taya mundial manera Usian Bolt, Churandy Martina i otronan. Kiko presis Kòrsou por logra ku Carifta Games? Pa kuminsá atraves di Carifta Games Kòrsou por bira mas konosí entre e pueblonan den Karibe i ta un faktor di importansia anto lógiko ku nos ta mantené kontakto ku pueblonan den Karibe. Pero promé ku tur kos mester sòru pa kumpli kabalmente ku e espektativanan, esta e stándartnan i palabrashonnan stipulá pa Carifta Games. Komo tal una bes ku Carifta Games ta bai tuma lugá na Kòrsou, tin kompromisonan esensial pa kumpli kuné, manera pèrkurá pa un kalidat garantisá di e weganan di atletismo, alokashon, registro i brinda fasilidat na e partisipantenan etcetera. E kantidat di atletanan ku ta partisipá kompetiendo pa oro, plata i bròns durante e weganan di 15, 16, i 17 di aprel 2017 na Kòrsou ta kalkulá na 600. Carifta Games naturalmente ta kai i lanta ku hopi publisidat di parti di prensa di e paisnan partisipante ku ta manda nan representantenan pa suministrá i difundí e informashonnan nesesario, anto ainda tin e papel di FLOW ku ta kubri e posibilidat pa alkansá e total di 200.000.000 televidente tantu den Karibe komo Canada i Merka. Tur dia ku tin e weganan 6 ora largu FLOW lo hiba transmishonnan transendental dirèkt for di Kòrsou. No mester lubidá ku Kòrsou resientemente a pèrdè Curacao North Sea Jazz Festival ku tabata sin duda un faktor di publisidat masha efektivo i impreshonante mes. Ademas ta konosí ku nos pais aktualmente ta konfrontando ku algun desaroyo no muchu sano, esta e kompania di aviashon Inselair ku finansieramente ta pasando momentonan krítiko, botikanan ku tin problemanan serio pa mantené kabes riba awa, hotèlnan ku menasa di dal porta sera i retirá trahadó. Te asina leu ta trata di hotèlnan Veneto i Plaza. Mirá for di e punto di bista aki so kaba Carifta Games ta brinda e posibilidat di oro pa aportá ku otro entradanan interesante i balioso pa Kòrsou. Un kampaña efektivo dirigí riba algun di e paisnan partisipante manera, Jamaica, Trinidad & Tobago i Bahamas, fásilmente por resultá den atrakshon di 3000 pa 4000 turista den Karibe pa bishitá Kòrsou pa presensiá e gran evento aki. Un situashon asina outomátikamente ta ofresé, meskos ku tabata e kaso na Rio de Janeiro, durante e temporada di weganan olímpiko, na nos sentro di suidat Punda i Otrobanda e chèns pa bini tremendamente den ‘picture’. Restorantnan, dancing i otro atrakshonnan turístiko lo kai full den atenshon i haña un bon boká. Ademas por hasi bon uzo pa benta di merkansia, alsa e interes pa atkerí souvernir i rekuerdonan impreshonante di Kòrsou. Ohalá ainda Kòrsou logra!

Erwin Raphaëla
5223737

This site uses Akismet to reduce spam. Learn how your comment data is processed.

error: Content is protected !!
%d bloggers like this: