Elsa Rozendal di MAN: Nivelnan di desempleo haltu si Kòrsou no prepará pa “Trabounan di Futuro”.

Elsa Rozendal di MAN: Nivelnan di desempleo haltu si Kòrsou no prepará pa “Trabounan di Futuro”.

Segun sifranan di Central Bureau voor de Statestiek (CBS), desempleo ta na un nivel di 11.3% na e promé mitar di 2016. Na 2015, e tabata 11.7% i na 2014, 12.6%. Esaki ta indikando un bahada leve di desempleo ku ta nifiká ku nos ta riba e bon kaminda.

Sin embargo, mundialmente, desaroyonan teknologiko riba tereno di Inteligensia Artifisial, Robotics i Automatisashon ta pone ku mayoria di trabounan ku nos tin awor aki ta bai kambia dentro di 5-10 aña.

Trabounan manera, kahera, trahadónan den area administrativo, mekániko, karpinté, security guards, tur ta ehèmpel di trabounan ku ta kore peliger di keda eliminá den futuro dor di e avansenan teknológiko aki.
E desaroyonan mundial aki tambe ta indikando ku desempleo lo subi drastikamente na diferente paisnan ku na e momentunan aki konosé nivelnan di desempleo basta abou.

Segun Rozendal, e desaroyo aki tardi òf tempran lo afektá Kòrsou tambe. Si nada no keda hasí esaki lo nifiká ku desempleo na Kòrsou lo por subí atrobe na nivelnan nunka bisto na Kòrsou.

Kon un pais chikitu asina manera nos por deal ku nivelnan asina haltu di desempleo? P’esei e problemátika aki mester bira punto di atenshon i diskushon di kualke gobièrnu na mundo inkluso aki na Kòrsou.

Mas desempleo lo nifiká mas kriminalidat i mas pobresa. Gobièrnu mester kuminsá pensa riba un plan pa kon ta deal ku e situashon aki. Trabounan nobo den e era digital lo keda kreá.

Rozendal ta di opinion ku nos mester kuminsá prepará nos hendenan ku tin un trabou na e momentunan aki pa nan por sigui funshoná ora e desaroyonan teknológiko aki alkansá nos teritorio.
Nos mester prepará nos muchanan for di ora nan ta den bankinan di skol pa nan tambe por haña un Trabou di Futuro.
Tambe nos mester prepará pa atendé ku hendenan ku pa motibo di desaroyonan teknológiko lo pèrdè nan trabou. Ki entrada nan lo bai tin? Goberná responsabel ta nifiká wak dilanti i planea pa futuro.

Sierto pais nan na Europa inkluso Hulanda ya kaba ta bai kuminsá otro aña eksperimentá ku un proyekto piloto di un entrada básiko pa su hendenan ku ta bai kai pafó di Merkado Laboral debí na e fenómeno aki. Gobiérnu mester kuminsá duna e tema di e efektonan di desaroyo teknológiko aki e importansia nesesario. Nos no por warda te ora ta lat.

Rozendal ta kontentu di a tende su kolega Eugene Ruggenaath, minister di Desaroyo Ekonómiko, bisa djabièrne último durante reunion di tratamentu di presupuesto 2017, ku ta bai traha riba un “Manpowerplan”, algu ku sigur Rozendal a bin ta boga p’e.

E asina yamá “Manpowerplan” mester tin komo meta tambe pa monitoriá e fenómeno di e asina yamá “Trabounan di Futuro” i asina por aktua na tempu riba dje.

Den e kuadro ei Rozendal a puntra Minister di Asuntonan Sosial i Labor señora Ruthmilda Larmonie, si e ta na altura di e desaroyonan aki i kiko ta su vishon pa ku “Trabounan di Futuro”.

elsa-phsjul-2016-21
Elsa Rozendal
Parlamentario Frakshon MAN

This site uses Akismet to reduce spam. Learn how your comment data is processed.

error: Content is protected !!
%d bloggers like this: