Área rekreativo i deportivo Juan Domingo ta haña forma

Área rekreativo i deportivo Juan Domingo ta haña forma

Geplaatst op 27 November 2020 dor di Ministerio Tráfiko, Transporte i Planifikashon Urbano

Willemstad – Riba 26 di novèmber, Minister Jesus-Leito a hasi un bishita na e proyekto di Juan Domingo, huntu ku funshonarionan di e ministerio, habitantenan di bario, kontratista i tambe miembronan di Unidat di Bario, pa tuma nota kon esaki ta avansando.

E proyekto aki ta pa realisá un área rekreativo i deportivo pa e bario, i pa pone e infrastruktura pa futuro desaroyonan den e área. Na e okashon aki por a tuma nota di un mashin sofistiká ku ta pone klenku rondó di e área.

Último añanan e área di Jan Noorduynweg a mira diferente desaroyo positivo, manera entre otro konstrukshon di Kooyman Megastore, un rotònde na altura di Cost-U-Less, i a duna La Curaçao un tereno komo opshon pa nan edifisio nobo. Awor ta sigui ku e plan aki kaminda ta enfoká tambe riba e aspekto sosial  i deportivo di bario.
Juan Domingo ta konosí pa su baluartenan den deporte, i tur aktor a mira e importansia pa duna rekonosementu i sigui stimulá esaki tambe. Pa e motibu aki, e área deportivo lo konsistí di un vèlt di futbòl, i un kancha multi- funshonal pa entre otro basketbòl i vòlibòl.