Ministerio di Salubridat, Medio Ambiente i Naturalesa ta rekomendá pa… KUSHINÁ SALÚ DURANTE DIANAN DI FIESTA
Ministerio di Salubridat, Medio Ambiente i Naturalesa ta rekomendá pa… KUSHINÁ SALÚ DURANTE DIANAN DI FIESTA
Willemstad – E temporada aki nos tur gusta disfrutá di platonan sabroso den seno familiar. P’esei nos mester skohe loke nos ta kome i bebe konsientemente, pa asina kuida e salú i naturalmente e peso. Departamentu di Dieta i Nutrishon di Asuntunan di Salubridat Públiko (ántes GGD) tin algun tep práktiko i balioso pa bo kushina salú den e temporada aki.
PREPARASHON DI KUMINDA NA KAS I DEN FAMIA
Pa komementunan na kas òf den famia tambe tin kosnan práktiko ku bo por hasi pa kushiná mas balansá manera por ehèmpel:
– Kita tur vèt visibel for di karninan ku bo ta prepará;
– Kita tur kueru for di galiña ora di preparashon;
– Evitá na hasa karni, prepar’é den su mes vèt dor di smor òf herebé;
– Ora prepará karni den fòrnu pone un baki abou pa fangu tur e vèt ku ta drep for di e karni;
– Prepará reyeno pa galiña òf kalakuna den fòrnu pone den un skal òf fòil asin’aki bo ta redusí e vèt konsiderablemente;
– Si ta prepará resetanan ku keshi skohe keshi ménos vèt (40+);
– Si ta uza sous òf dressing banda di bèrdura òf salada di bèrdura skohe pa e tiponan “light” òf “low fat”. Ta bon pa kompará diferente marka i skohe den nan esun ku tin ménos vèt;
– Tambe por uza “cottage cheese” òf yoghurt sin vèt pa sous riba salada di bèrdura;
– Si ta traha salada brua esaki ku mayonès ku ménos vèt òf sin vèt (“fat free òf “low fat”);
– Si ta traha salada ku webu uza solamente blanku di webu;
– Ora ta traha kosnan ku mester uza lechi skohe pa uza lechi sin vèt manera den bolo, pandushi, bolo di glas, pudin, quesillo, chukulati, sous etc.;
– Si ta traha kosnan ku mester uza webu uza solamente e blanku di webu òf uza mitar di e kantidat rekerí huntu ku lechi;
– Pa postrenan ku ta rekerí lechi kondèns por uza ½ lechi kondèns i ½ lechi sin vèt.
TENE KUENTA KU ESAKI TAMBE
– Ta importante pa bo sigui hasi ehersisio i moveshon durante dianan di fiesta. Esaki ta yuda pa stimulá bo metabolismo i kima èxtra kaloria.
– Kòrda bebe sufisiente awa, 1-2 liter di awa pa dia (8 glas di awa).
– Evitá na kome anochi lat ya ku e nutrientenen lo keda wardá den forma di vèt den e kurpa .
– Si awe bo a kome poko dimas tene kuenta ku e dia siguiente pa bo kome ménos i pa asina tene e metabolismo den balansá.
Ministerio di Salubridat, Medio Ambiente i Naturalesa ta deseábo felis dianan di fiesta pero semper kome i bebe na midi i di un forma saludabel.