‘E ACUERDO   CU CITGO/PDVSA …. TA KEDA UN  AVENTURA CU HOPI RISICO PA ARUBA  …‘ONE BIG MESS’ !!’

BENNY NISBET (PPA):

‘E ACUERDO   CU CITGO/PDVSA …. TA KEDA UN  AVENTURA CU HOPI RISICO PA ARUBA  …‘ONE BIG MESS’ !!’

Poco poco mas claridad ta saliendo rond di e ‘acuerdo cuestionable cu CITGO/PDVSA’.  Diasabra 24 di December un matutino a publica ‘Citgo completamente hipoteca……Venezuela y PDVSA no tin mando riba Citgo mas’. No kabe duda cu e publicacion aki a sacudi pueblo di Aruba tanten cu dentro di e preparacion pa Pascu pueblo tabatatin tempo pa profundisa nan mes dentro di e 2 articulo relaciona cu e informe aki esta e informacion mes y e opinion redactional.

PPA como ‘unico’ partido politico cu for di inicio a cuestiona e acuerdo aki den su totalidad sin embargo no ta sorprendi pero ta mira e informe aki  cu poco poco lo bai desenmascara  henter e ‘deal’ cu Citgo y lo demonstra cu nos pais Aruba a worde hinca den un ‘aventura’ cu lo tin capitulo hopi amarga pa nos pais y nos pueblo. Nos pais Aruba a worde bendi barata…sacrifica !!

Esnan cu por corda ….E siman cu e firmamento a tuma lugar bao di un ‘show’ enorme na Caracas, Venezuela, e.o. PPA tabata e partido cu a publica e comunicado di Citgo Petroleum cual comunicado a bisa cu Citgo Petroleum Corporation no a firma nada …nan ta envolvi solamente como ‘consultant’. Y tambe nan a splica mundo Petrolero cu aki ta trata un proceso pa ‘transforma e fascilidad na Aruba den un Upgrader’. For di e momento aki PPA a bai hasi nos ‘huiswerk’ pa nos comprende e diferencia entre un upgrader y un refineria y nos a cuminsa splica nos pueblo cu algo ta hopi robez aki. Nos pregunta e.o. tabata pakiko Citgo Petroleum tabata tin e necesidad pa publica un comunicado cu tabata parce ‘robez’ for di locual gobierno di Aruba tabata splica pueblo di Aruba ?

Publicacion di ‘bispo di pascu’ di  e interes di Citgo pa cu su accionista PDVSA/Venezuela ta birando mas y mas cla pa kade kende cu realmente kier sa algo mas di e ‘one big mess’ aki !! Esta e hecho cu a hipoteca  Citgo completamente. E publicacion na juni 2016  tabatatin como meta pa tene nan financiadornan tranquil esta cu Citgo Petroleum lo no tabata hincando su mes den mas responsabilidad financiero pero cu na e Isla di Aruba lo tin un desaroyo rond di un fascilidad cual nan lo no ta envolvi financieramente pero solamente como consultant.  Un ponencia cu PPA y otro (no politico)  a keda cuestiona ! 

Ainda nos ta corda e publicacion di Reuters unda a sali na cla  Citgo lo a manda puntra PDVSA holding pa un ‘tranche’ di 100 million dollar pa inicia e  projecto na Aruba. E hecho cu Citgo Aruba NV no por a cuminsa funciona y cu segun declaracion lo mester warda  te otro anja april/mei 2017 ta bisa hopi ……e ta accentua con hopi e crisis na Venezuela lo affecta e funcionamento di Citgo Aruba NV den futuro y ta accentua tanto e aventura como e caos/mess den cual gab Mike Eman a hinca nos pais.

Cu tur respet pa PDVSA cu a conoce su bon tempo tambe….pero nan ‘record’ di ultimo anja ta hopi tristo y e solo hecho cu Aruba a sinti e consecuencia financiero/economico di ta mara na e mercado Venezolano pa locual ta trata  Aviacion, Turismo  mester a pone gab Mike Eman pensa profundamente si ta vale la pena pa Aruba mara su mes cu asina hopi ‘risico’ pa nos economia  y salud publico na un aventura asina ??  PPA su contesta como ‘unico’ partido politico cu e analisa e asunto aki profundamente  a contesta cu NO !!

E.o. pasobra ta trata ‘transformacion den un Upgrader’ y ningun pero ningun momento re-apertura di nos refineria. Esnan cu ta usa e terminologia ‘re-habilitacion di nos Refineria’ ta tuma nos pueblo di Aruba hasi………..pa mi no usa palabra menos acceptabel. !!

E.o. pasobra unda tin ‘upgraders’ pa procesa e  ‘bitumen’, e  tar/lodo, e ‘extra heavy oil’ of con cu bo kier jamele tin hopi mas sushedad cu unda tin refineria normal.  Mas CO2…..Mas waste products…y hopi mas risico pa salud publico.  PPA no ta larga ningun cu ta asina jama ‘profesional’ y ta sirbi interes di esnan envolvi den e aventura aki enganja nos pueblo arubano. 

E.o. pasobra na Aruba un Isla cu ta depende pa 90 % pa turismo awor lo permiti un ‘upgrader’ na San Nicolas envez di un refineria….cu hopi risico cu lo dura un 15 pa 25 anja !!

E.o. pasobra unda tin Upgrader tin hopi y hopi mas caso di  cancer y malesa respitorio etc….!!Dios juda mi pueblo en general San Nicolas en particular. 

Aruba no merece di bai pasa un Aventura asina …’One big Mess’  di cual locual nos ta senjala ta simpelmente e cabez di e seroe di ijs(ijsberg) y cu e consecuencia dramatico lo cuminsa ‘bati’ na porta di nos sociedad …

CON BIN ARUBA TA DEN E AVENTURA AKI ??

Awor e pregunta:  Con bin Aruba por a jega asina leeuw ? Kizas lo tin den nos sociedad cu lo contesta esaki …si nos problema financiero….si nos problema economico….!!  PPA ta rechasa un contesta asina. p

Contesta di PPA  pasobra Aruba tin un gobierno cu ta kere cu ‘bisti’ un fluz y pretende di ta gobernante ta dunabo e sabiduria di un don sabe lo todo….di e estilo di goberna hopi vez bo so ….sin  scucha e grito di pueblo.

Contesta di PPA pasobra Aruba  su parlamento No a conoce un parlamento cu realmente ta funciona….cu no ta hasi su ‘huiswerk’ manera mester ta !! Fuera di esaki  un oposicion cu ta pretende cu ta nan a logra habri e refineria y no gobierno…..a crea un situacion cu e oposicion aki ..no por a opone… no por a controla manera debe ser …oposicion tabata mas mara na e acuerdo cu CITGO cu gobierno mes…!! E ponencia cu oposicion no a ricibi documento na hora….no a hanja copia pa nan mes studia… tur ta argumentonan valido….pero nan validez ta ‘smelt’  ora e oposicion aki sa delanta cu nan y aki PPA ta jama nomber  MEP y (x) Dem Real NO por a vota contra ni maske kiko ta mal poni den e acuerdo/deal cu gobierno a sera !! Pakiko ??  Ora bo ta kana  pretende cu abo a sera ‘deal’ na Venezuela …cu tur cos ta cla kaba ..pasobra abo a reglele…anto como oposicion bo no por hasi nada otro cu vota PRO….y consecuentemente aki ta unda hopi ‘interes di pueblo arubiano’ a worde sacrifica. Pa un oposicion ‘zwak’ y pa sirbi ‘interes partidista’  y no sirbi bienestar general.

Pesey PPA ta tene gabinete Mike Eman/de Meza  responsabel pa e consecuencia di e ‘aventura cu CITGO’ …..cual nos ta ripiti e consecuencia ta awor nan lo cuminsa Sali.  PPA ta tene e 20 miembro di parlamento cu a vota ‘pro’ sin cu nan realmente sa y ta comprende kiko ‘tur’ ta den e acuerdo/deal negocia pa gab Mike Eman/de Meza y un vez mas srs y pueblo e consecuencia di nos futuro ‘upgrader’ ta masha hopi mes…nan ta peor  cu e ‘problematica di garantia’ nan ta peor cu e problematica rond di e ‘racetrack’ ..nan ta peor cu e aventura di aqua nova etc etc….!! Aruba su ‘risico’ segun PPA ta core den mas cu un billion florin….hopi hopi mas !! Y hopi dolor riba tereno di salud publico !!

PPA ta ripiti nos ponencia  …..!  Nos sociedad ta baiendo direccion pa un eleccion na 2017 unda pueblo lo mester tuma su decision …pero principio di PPA e partido funda pa sr Juan E. Yrausquin q.e.p.d ta ‘cu esnan cu ta responsabel pa e caos no por forma parti di e solucion’. Aki ta momento pa pueblo tuma un decision ‘dramatico’. Mester di un gobernacion cu ta consisti di gobernante cu no tabata envolvi den crea e caos aki  y mester di un parlamento completamente renova no basa riba e hecho cu un partido tin un majoria !! E contesta ta un ‘balansa di pober’ …!! Palabra lo keda na nos digno pueblo !!
Aruba, 26 di December 2016                                               Lider Politico di PPA

                                                                                                  BENNY NISBET

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: