Programa Bario pa Bario 7 di yanüari 2017 a kumpli 22 aña.

Programa Bario pa Bario 7 di yanüari 2017 a kumpli 22 aña.

Eksperensiando prinsipalmente e komportashon tin biaha hopi violento i agresivo di sierto yunan di Kòrsou bibá na Ulanda, durante fiesta i of otro enkuentronan sosial grandi ku bandanan musikal ku ta bin hasi gira na Ulanda for di Kòrsou i of marcha di Karnaval na Utrecht i awendia na Rotterdam, a drenta Erwin Raphaëla e idea pa kuminsá 22 aña pasá ku un programa di konsientisashon na radio. Tristu pa rekonosé, pero tin numeroso kasonan di yunan di Kòrsou bibá na Ulanda ku pa un simpel diferensia di opinion ku a surgi den forma di un pleitu a pèrdè nan bida durante e konflikto ku a eskalá. Nan a keda asesiná ku arma di kandela of hinká ku kuchú.
Zomerkarnaval en prinsipio a kuminsá na Utrecht, pero debí na tur e kasonan di asesinatonan ku a tuma lugá, e biahanan ku e karnaval aki tabata na Utrecht, outoridatnan di e munisipio aki a disidí di no duna pèrmit mas pa Zomerkarnaval tuma lugá den Utrecht. Sinembargo tabata munisipio Rotterdam ku a bai di akuerdo pa tuma Zomerkarnaval over, argumentando ku Zomerkarnaval tòg lo por ta un aporte interesante pa e ekonomia di Rotterdam i of promoshon di un ambiente mas eksótiko. Na un otro momento a surgi otro problema serio den sentido ku vários munisipio na Ulanda a ninga redondamente pa sigui duna pèrmit pa fiestanan di yunan di Kòrsou tuma lugá, esaki prinsipalmente pa konfliktonan ku por presentá despues. Fresku ta den nos memoria ainda kon durante un fiesta ku e banda musikal mas popular i gustá di Kòrsou, hasiendo gira rònt Ulanda pa deleitá yunan di Kòrsou bibá aya na Tera Friu, a konfrontá ku un tiroteo ordinario ku a start den sala di fiesta aya na Den Haag, pone ku míles di bishitante mester a drumi plat abou na suela, pèrdiendo propiedatnan importante manera tas, oloshi, kadena, sapatu etcetera. E enorme sustu i spantu ku e situashon penoso ei a krea, kasi no por keda deskribí. No papia mes di e tantísimo eksperensianan amargo di dancing i of bar bishitá pa yunan di Kòrsou ku mester a sera nan porta, despues ku bishitante a keda asesiná kruelmente.
E sirkunstansia manera ariba deskribí tabata rason pa na aña 1995 start un programa di konsientisashon ku ta konsentrá riba aspektonan manera kombibensia, solidaridat ku otro, kòntròl sosial, sentido di responsabilidat kolektivo etcetera, pero saliendo dirèkt for di e ángulo di bario. E programa aki ku komo titulo Bario pa Bario t’esei ta Kòrsou su promé transmishon tabata dia 7 di yanüari di aña 1995 na vèlt di Mundu Nobo, e tempu ei transmití atraves di mikrofonnan di Curom Z’86. Entre tantu for luna di mei di aña 2002 programa Bario pa Bario ta na radio Hoyer, frekuensia 101.9 FM. Programa Bario pa Bario en realidat no ta nada otro sino un programa di konsientisashon ku lo mester sirbi manera un plataforma bibu pa interkambiá di opinion i idea di un forma efektivo, kreando kuadronan di pensamentu tokante e importansia di bario komo un entidat klave den nos komunidat. Temanan manera historia sosial, aspektonan di famia, komersio i negoshinan den bario, deporte, kultura, arte, plantashon i krio di bestia, salú i medioambiente, infrastruktura, lógikamente ta forma e variedat di posibilidatnan ku tin. Ounke programa sin duda tabatin su momentonan di gloria, disfrutando di un enorme sintonia, loke a stroba desaroyo real di e entidat bario na Kòrsou ta maneho di gobièrnu ku den práktika su efektonan tabata diametralmente kontra di bario. Retiru di trahadó i of profeshonalnan den bario, pero sigur e falta konstante di un balorashon korekto di e efektonan di bario komo ángulo di desaroyo integral di nos pais ta e kousa prinsipal ku bario no a desemboká den un instrumento di kambio i progreso pa e komunidat di 150.000 habitante. Nos a haña nos ku un sosiedat ku poulatinamente a hañ’é ku barionan mal deteriorá, ku shushedat i konsentrashonnan a-higiéniko plenamente na sitionan públiko, krímen di tur sorto di índole kuminsando for di ladronisia di outo te atrakonan armá i of likidashonnan komo konsekuensia di konfliktonan entre bandanan kriminal, deskuido struktural di hubentut. No simplemente maneho di sentronan di bario, sino e balorashon real di bario komo un entidat stratégiko pa kondusí na adelanto i progreso di nos isla ta faktor inevitabel pa e isla aki por kana ordená bai dilanti. Ku mi a wanta 22 aña largu ku e programa aki on aire, no ta danki na mi so, sino na e emisoranan, empresanan ku a sostené finansieramente i e públiko en general. Pero pa barionan su kalidat subi di bèrdat, mester di gobernantenan ku ke profundisá den e materia aki, kendenan lo ta dispuesto pa reuní ku konseheronan agrupando métodonan, proyekto, strukturanan i strategia ku a proba barionan su impakto efektivo.

Erwin Raphaëla

erwin-raphaela

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: