“ STATEN DI ARUBA TA NA CORSOW PA IPKO CU DELEGACION DI 12 PERSONA…. APARENTEMENTE E CRISIS FINANCIERO DI PAIS ARUBA A SMELT ??”


BENNY NISBET (PPA):
“ STATEN DI ARUBA TA NA CORSOW PA IPKO CU DELEGACION DI 12 PERSONA…. APARENTEMENTE E CRISIS FINANCIERO DI PAIS ARUBA A SMELT ??”
No mucho tempo atras PPA a cuestiona un otro delegacion di Staten cu a biaha silenciosamente pa Panama pa reunion di Parlatino. E tempo ey un miembro di staten a larga sa cu e ta bai mientras e delegacion a viaha den un silencio. PPA a cuestiona publicamente pa Staten larga sa cuanto di cuanto persona/miembro di Staten e delegacion aki a consisti ? SInembargo Staten a keda den un silencio como sifuera cu pueblo di Aruba no mag di sa ki ora y cuanto miembro di Staten ta viaja.
Mientras tanto awe mi tabata waki noticia unda tabata pasa e entiero di sr. Lio ‘paps’ Capriles …un legendario Bancario cu a fayece na Corsow. Durante e noticiero aki a pasa un entrevista cu drs Mervin Wyatt, presidente di Staten di Aruba na e entiero aki. Durante e entrevista aki el a splica cu Staten tin un delegacion presente na Corsow pa reunion di IPKO y nan a dicidi di participa na e entiero locual nos tur por aprecia. Pero seguidamente nan a pasa e caranan di miembronan di Staten di Aruba y mi a conta 11 miembro di parlamento y e griffier cu ta un delegacion di 12 miembro di Staten y kizas nan por a jera un of dos mas cu mi no a mira.
Un delegacion di 12 persona di cual minimalmente 11 miembro di Staten cu ta mas cu mitar di Staten di Aruba ta demonstra masha poco responsabilidad pa cu e situacion di un crisis financiero/economico di nos pais. Staten sa debidamente bao di cuanto medida nos pueblo tin di biba pa paga e debe nacional cu a worde crea pa gab. Mike Eman cu nan x ministro di finanzas sr. Mike de Meza alias the mess. Un delegacion di siete of ocho miembro lo tabata mas cu suficiente pero pa hiba 12 persona di cual minimalmente 11 miembro di Staten ta algo increibel.
Aki tanto coalicion como oposicion ta falta di respet pa nos pueblo di Aruba ! Pero PPA mester accentua un oposicion cu ta participa den un delegacion di 12 persona ta pone su credibilidad den tapara. Door di actua asina tanto miembro di AVP como miembro di MEP y otro ta demonstra cu nan tambe por gasta placa pa loco apesar cu Aruba ta den un crisis financiero hopi serio.
PPA ta di opinion cu Staten mester bai bek na cierto principio cu tabata worde usa den pasado:
A. Nunca mag sali for di Aruba cu mas cu mitar di miembro di Staten un majoria di miembro di Staten mester ta na Aruba na tur momento !!
B. Tur fraccion mester ta representa cu minimalmente un miembro.
C. Despues di cual por agrega miembro conforme grandura di fraccion.
D. Pero nunca lo forma delegacionan cu ta absurdamente grandi.
E. Presidente y vice presidente no por forma parti di e mesun delegacion…Un mester ta na Aruba na tur momento !!.
PPA ta ripiti un delegacion responsabel cu ta tene cuenta cu e situacion financiero esta e crisis cu Aruba ta den un delegacion no por ta mas grandi cu siete(7) of ocho (8) miembro di Staten y no 11 of 12 !!
Lo ta bon pa Staten publica e delegacion cu tur su miembronan cu a viaha pa pueblo por tuma nota di esaki !! Y Staten lo mester publica cuanto e delegacion aki pa IPKO na Corsow a costa nos pueblo pagador di belasting !! Lo ta bon pa Staten cuminsa informa pueblo di Aruba encuanto di ki dia e racha di medida lo worde hala aden pasobra si tin placa pa Staten viaha pa loco anto Staten no por controla gobierno pasobra simpelmente e crisis a smelt a lo menos e actitud irreponsabel aki ta crea e impression aki.

Aruba, 9 di januari 2017 Lider Politico di PPA
BENNY NISBET

Advertisements