Brandweer Kòrsou a Huramentá 13 Personal Nobo
Brandweer Kòrsou a Huramentá 13 Personal Nobo
WILLEMSTAD – Djabièrnè dia 06 di Yanüari 2017 den oranan di atardi, durante un seremonia den ouditorio di Banko Sentral di Kòrsou i Sint Maarten, Kuerpo di Brandweer Kòrsou a tene su seremonia di Huramentashon i Instalashon di diferente miembro den nan Kuerpo di Brandweer. Na 2015 Kuerpo di Brandweer Kòrsou a inisiá ku e proseso pa a reklutá miembronan nobo pa e Kuerpo despues ku a indiká ku tin skarsedat di personal komo pagadó di kandela. Huntu ku esaki, Brandweer Kòrsou tabata den e proseso tambe ku vários personal tabata yega e edat di penshun i no tabata tin remplaso pa nan. Despues di a risibí aprobashon di Gobièrnu, Brandweer Kòrsou a hasi e proseso pa rekluta bomberonan i a haña un total di 13 miembro nobo ku a drenta pa forma parti di e Kuerpo. E 13 pagadó di kandela nan aki a keda repartí na diferente kazèrne di Brandweer, pa asina yuda reforsá e kuerpo den e trabounan diario.
Despues di huramentashon, e Aspirant Brandwachtnan aki a risibí tambe nan Sertifikado, despues ku nan a finalisá nan promé parti di estudio komo Brandwacht. E estudio den su totalidat ta dura 3 aña, den kual e promé parti ta finalisá ku e sertifikado di Brandwacht, i awor nan lo kontinuá ku e segundo parti di estudio pa asina finalisá den rango di Brandwacht 1e Klasse. Próksimamente Kuerpo di Brandweer Kòrsou ta spera di por siguí krese ku mas personal den e Kuerpo, mirando ku awor e Kuerpo ta konta ku 4 kazèrne di Brandweer.