Elsa ta sigui komo Lider di Frakshon den Parlamento!
Elsa ta sigui komo Lider di Frakshon den Parlamento!
Mi kerido siguidónan,
Ya pa un tempu kaba hopi di boso ta den ekspektativa pa e momentu ku mi ta huramentá komo Minister di Enseñansa, Siensia, Kultura i Deporte. Lastimamente mi tin ku informá boso ku den wikènt ku a pasa mi partido, MAN, a pidimi pa mi deshasí di e intenshon pa ehersé e responsabilidat di e Ministerio di Enseñansa, Siensia, Kultura i Deporte pa motibu ku mi partido su intenshon ta pa amplia e koalishon aktual i asina krea mas stabilidat den gobernashon.
Aunke ku originalmente mi a aseptá e reto i tabata kla pa asumí e responsabilidat, mi tin FUL KOMPRENSHON pa e motivashon tras di e petishon di mi Partido i ta aseptá pa pone e puesto di Minister na disposishon di Partido ya partido por enkaminá e proseso pa amplia e koalishon aktual. Meskos ku pa abo, p’ami tambe stabilidat den gobernashon i trankilidat di nos pueblo ta na promé lugá. Aunke ku durante e último simannan mi a dediká hopi tempu pa mi por prepará mi mes debidamente pa asumí e responsabilidat di Minister di Enseñansa, Siensia, Kultura i Deporte, mi ta aseptá e petishon di mi partido i laga e oportunidat bai pa sirbi boso komo Minister. Esaki na bienestar di stabilidat i trankilidat di nos pais.
Komo Minister di Enseñansa, Siensia, Kultura i Deporte lo mi lo a hasi mi máksimo esfuerso pa trese e kambionan tan deseá den nos sistema di enseñansa, i asina garantisá ku nos muchanan por gosa di enseñansa di kalidat haltu. Mi por garantisá boso ku komo parlamentario tambe lo mi esforsá mi mes pa mi por duna un kontribushon balioso na nos sistema di edukashon, algu ku nos hendenan ta sklama p’e.
P’esei ku un kurason trankil i ku hopi energia mi ta kla pa sigui traha komo Lider di Frakshon di MAN den Parlamento. Danki pa bo komprenshon, Partido MAN i mi persona ta sigui konta ku bo sosten.
Elsa Rozendal
