Confiansa di consumidor ta crece levemente den e di cuatro trimester di 2016

edifisio-banko-central-aruba

Confiansa di consumidor ta crece levemente den e di cuatro trimester di 2016
18 di Januari, 2017

Confiansa di e consumidor a subi un poco den e di cuatro trimester di 2016 segun e ultimo resultadonan di e Encuesta di Confiansa di Consumidor (CCS) di Banco Central di Aruba (BCA). E Indice di Confiansa di Consumidor a sera na 96,1 pa e di cuatro trimester di 2016, subiando cu 0,1 punto di indice compara cu e trimester anterior (mira Grafiek 1) . Un bista menos pesimista pa condicionnan actual ta parce di ta e factor principal afectando e confiansa di consumidor.

Consumidornan a evalua e situacion actual menos negativo compara cu seis luna pasa ya cu e Indice di Situacion Actual a subi cu 1,7 punto di indice te na 96,5. Sinembargo, e futuro expectativanan di consumidor tabata un poco mas abou ya cu e Indice di Expectativanan a empeora di 99,6 te na 99,3 compara cu e periodo anterior.

Consumidornan tabata tambe mas neutral riba e futuro cercano den e di cuatro trimester di 2016. E grupo di consumidornan cu ta spera cu nan condicionnan financiero personal lo permanece igual a subi di 36,1 porciento te na 40,8 porciento. Esaki tambe tabata e caso den nan sentimentonan di, respectivamente, condicionnan di negoshi pa futuro (di 33,7 porciento te na 49,3 porciento) tambe den e posicion financiero di gobierno pa futuro (di 28,8 porciento te na 39,5 porciento) y e expectativanan di empleo (di 23,8 porciento pa 29,o porciento). Sinembargo, mas consumidornan ainda ta kere cu e expectativanan pa empleo lo empeora (di 44,9 porciento pa 44,5 porciento).

E indicenan di expectativa di prijs y custumber di compra di consumidor a empeora den di cuatro trimester. E Indice di Expectativanan di Prijs a baha te na 90,2 den e trimester bou repaso. A pesar di e anuncio di rebaho den prijs di coriente, e porcion di consumidornan indicando cu prijsnan lo ta mas abou den e siguiente seis luna a baha di 2,8 porciento te na 0,8 porciento. Finalmente, mayoria di consumidornan a indica cu no tabata apropia pa cumpra un auto (66,0 porciento), aparatonan grandi (55,5 porciento), bai riba vakantie (40,8 porciento) haci un prestamo (63,8 porciento) of un hipoteca (72,8 porciento). Maske tin un crecemento consistente den hipoteca, solamente 6,3 porciento a indica cu ta apropia pa haci un hipoteca, kibrando e resultado mas abou di 7,3 porciento e encuesta cu a wordo registra den e trimester anterior. E resultadonan aki a baha e indice di habito di consumo pa un record di 94,3.

Resumiendo, e crecemento minimo den confiansa di consumidor a wordo atribui na un subida den indice di Situacion Actual cu a wordo mitiga pa tur otro componente di e Indice di Confiansa di Consumidor.

Por obtene e resultadonan completo di e encuesta aki for di e website di BCA (www.cbaruba.org). Pa mas informacion por tuma contacto cu e Departamento di Research, na research.department@cbaruba.org.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: