SESHONNAN DI FORMALISASHON OKUPASHON ILEGAL TA SIGUI POR ELIMINÁ ILEGALIDAT PA MEDIO DI FORMALISASHON TE KAMINDA TA POSIBEL
SESHONNAN DI FORMALISASHON OKUPASHON ILEGAL TA SIGUI POR ELIMINÁ ILEGALIDAT PA MEDIO DI FORMALISASHON TE KAMINDA TA POSIBEL
Willemstad – Djárason próksimo, 25 di yanüari 2017, Minister Camelia-Römer huntu ku Domeinbeheer ta sigui ku e seshonnan di informashon riba formalisashon di e okupashon ilegal. Tur kaminda por a tende e lema “Tereno pa tur, pero na òrdu si” durante di e kampaña pa informá e públiko i duna splikashon tokante di e maneho di ‘Sero Toleransia’ ku ta vigente for di òktober 2015, ora ku Minister Camelia-Römer a hala un strepi i a introdusí esaki pa stòp kasonan nobo di okupashon di tereno ilegal.
Na yüni 2016 a kuminsá ku un seshonnan di informashon pa splika kiko ta pasa ku okupashon di tereno ilegal eksistente, esta ku ta kai bou di e maneho di hopi aña pa legalisá loke ku por. Ademas, e seshonnan ta pa eliminá ilegalidat pa medio di formalisashon, te kaminda esaki ta posibel. Pa logra esaki, Domeinbeheer ta traha pa registrá tur uso ilegal. A lanta un tim ku ta spesialmente enkargá ku e tareanan aki. For di luna di ougùstùs 2016 a tene seshonnan di informashon den diferente bario, kaminda ta brinda oportunidat pa mèldu boluntariamente i hasi un petishon pa bini na remarke pa eventual formalisashon.
Ya kaba a tene algun seshon di informashon na e.o. Montaña, Rooi Santu i Santa Maria, i un total grandi di siudadano a registrá. Huntu ku otro kasonan di petishon pa formalisashon, tin vários petishon di formalisashon den prosesamentu. Banda di esaki, siudadanonan tambe ta mèldu kasonan di okupashon ilegal.
Trabounan di mantenshon di òrdu ta tuma lugá simultáneamente. Ku e meta pa stòp okupashon ilegal eksistente, un tim ta tur dia riba pia ta kontrolá rònt Kòrsou pa kaminda ku tin kaso di okupashon ilegal, stòp esaki, i evitá pa kuminsá ku kasonan nobo. Den e kuadro aki a papia ku siudadanonan pa splika nan di e maneho di ‘Sero Toleransia’ i a pone bòrchi pa prohibí okupashon i konstrukshon ilegal.
Pa mas informashon di tur e desaroyonan rondó di Minister Camelia-Römer su akshonnan por bishitá e página di Facebook “Minister Suzy Camelia-Römer”.