Uza Carifta Games komo heru kayente pa strika!

Uza Carifta Games komo heru kayente pa strika!

Ta di nos grandinan e proverbio di strika ora e heru ta kayente, pa motivá ku lo mester hasi mayor uzo di un oportunidat ku presentá.
Un nota sumamente positivo di e siman ku a kaba ta e desishon konhunto di parti di ministernan Hensley Koeiman i Kenneth Gijsbertha pa finansiá e iluminashon nesesario di stadion Ergilio Hato den Sentro Deportivo Kòrsou. Esaki mesora ta konfirmá ku Kòrsou ta bai kumpli ku un di e eksigensianan importante pa garantisá buena marcha di e espektakular evento aki, kaminda nos isla ta fungi komo anfitrion. Manera ta konosí Kòrsou lo ta sede di e prestigioso Carifta Games 2017 ku ta enserá kompetensianan di renombre entre atletanan di Karibe. Islanan sumamente interesá manera Jamaica, Bahamas, Trinidad & Tobago, Barbados i otronan lo delegá atletanan pa partisipá na e prestigioso evento aki. Anto ta asina ku Carifta Games lo keda kubrí pa e empresa di televishon FLOW ku práktikamente lo ta 7 ora diariamente den transmishonnan bibu durante e kompetensianan aki direktamente for di Kòrsou. E desishon di gabinete Koeiman pa finansiá e lusnan ta unu sumamente krusial i ta bai kosta 850.000 florin. Segun direktor di Fundashon Desaroyo Deportivo Kòrsou (FDDK), señor Thakai Doran, debí na e situashon di urgensia no a sigui e prosedura normal di tene destaho públiko, sino a aserká 2 empresa spesialisá pa oferta i e desishon final ta ku un di e empresanan aki a keda kontratá. Ademas ta asina ku no kier menshoná nòmber di e empresa ni tampoko e pais kaminda e ta establesé. Den seno di esnan enkargá ku organisashon di Carifta Games na Kòrsou i tambe serka klupnan di atletismo e desishon aki porfin ta reflehá e seriedat ku ta korespondé ku un evento asina. Segun kalkulo den luna di mart, esta djis un par di siman promé ku e weganan tuma lugá, e instalashon di lus lo keda realisá. Pero, ohalá por start maske ta awor (3 luna promé ku e evento) un kampaña agresivo i sigur efektivo pa atraé interesadonan den paisnan manera Jamaica, Bahamas, Trinidad & Tobago, Barbados i Sürnam pa bin presensiá Carifta Games serka nos aki na Kòrsou. Atraves di un kampaña asina ei por logra atraé 4000 pa 5000 turista di den Karibe bini Kòrsou pa presensiá Carifta Games, loke outomátikamente lo duna hinter un bida den nos sentro di suidat Punda i Otrobanda. Pero, ta rekerí di nos dirigentenan di bèrdat un aserkamentu di saka mas tantu djus posibel pa Kòrsou for di Carifta Games 2017 i tur loke esaki ta ofresé. Den e suidat Rio de Janeiro durante e temporada di weganan olímpiko hopi ta e turistanan ku a drenta e suidat pa disfrutá práktikamente tur dia di un tremendo ambiente, bishitando prinsipalmente restorant, boutique, pakus i otro atrakshonnan úniko, debidamente programá pa surti efektonan positivo na benefisio di Rio de Janeiro! Benta di souvenir tabata un di e aspektonan fenomenal ku brazileronan a konsentrá riba dje i debidamente a benefisiá e ekonomia di Rio de Janeiro. Lógikamente Kòrsou na okashon di Carifta Games 2017 tambe mester por, pero hopi ta dependé di e grado di ambishon ku e organisadónan enkargá ku e evento ta desplegá, anto prinsipalmente e magnitut ku ke krea pa e gran evento aki na Kòrsou! Ohalá por hinka speed tambe den e promoshon di Carifta Games na Kòrsou mes, pa subi e interes di tal forma ku stadion Ergilio Hato ta yena tur dia, ya ku únikamente di tal manera ta logra ‘boost’ atletismo na nos isla. Carifta Games 2017 finalmente mester resultá un promoshon grandi pa e nòmber di Kòrsou den Karibe, hasi nos mas konosí i atraktivo! Danki ku ministernan Hensley Koeiman i Kenneth Gijsbertha, kendenan klaramente a demostrá di ta mira benefisionan i ta tantu envolvi pa duna e aporte nesesario, pero nos ta leu for di kla. Apart di e punto di bista puramente deportivo, mester pone komo prioridat haltu tambe aspektonan relashoná ku nos ekonomia, esta den e kuadro di Kòrsou komo un destino turístiko atraktivo. Mas tantu posibel mester trata na yega na palabrashonnan ku e empresa FLOW kaminda ku sierto frekuensia ta brinda tambe imágennan atraktivo i yamativo di nos isla.

Erwin Raphaëla

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: