RESPONSABILIDAT PA NOS YUNAN TA NOS MES KOMO MAYOR Den kuadro di transporte eskolar pa muchanan di skol

gobiernu-di-bonaire1.jpg

RESPONSABILIDAT PA NOS YUNAN TA NOS MES KOMO MAYOR Den kuadro di transporte eskolar pa muchanan di skol

Kralendijk – Pa por sirbi nos pueblo mihó posibel gobièrnu di entidat públiko Boneiru ta supsidiá transporte ku bùs di skol pa muchanan ku di otro manera pa un òf otro motibu no por yega skol na tempu i yega kas bèk na tempu di un manera responsabel, sigur i normal.

Di e manera aki, komo gobièrnu konsiente di su responsabilidat pa ku e pueblo, nos ta spera di yuda den algu ku di otro manera lo por ta un peso muchu pisá pa sierto famianan di Boneiru.

Pero esaki no ta kita si ku e promé responsabel pa nos yunan ta nos mes komo mayor.

Laga nos tuma e responsabilidat aki na serio i ban wak komportashon di nos yunan di un manera stret pa nos por stret nan ora ta nesesario. Asina nos ta yuda evitá ku nan ta bira un problema pa nan mes i pa nos komo mayor, pero tambe pa otro muchanan, pa shofùr di bùs, pa seguridat di tur hende den tráfiko i pa hinté e sistema ‘’bùs di skol’’ i finalmente pa hinté komunidat.

P’esei nos ta pidi mayornan pa papia serio ku e yunan pa nan respetá i obedesé reglanan di òrdu i disiplina. Muchanan ku dor di nan komportashon ta stroba òrdu, trankilidat i buena marcha di e fasilidat ‘’bùs di skol’’ lo no por hasi uso mas di e sistema aki i nan mayornan lo keda kompletamente responsabel pa e mucha su transporte pa skol i kas vise versa.

Finalmente nos ke kòrda mayornan pa paga e kontribushon chikitu ku ta pidi pa karchi, pa evitá ku e yu(nan) lo keda sin por hasi uso di ‘’bùs di skol’’.

Muchanan ku pa dia 1 di òktober 2016 ainda no a enteregá karchi pagá na shofùr di bùs NO POR KORE ku e bùs.

Aki ta sigui algun reglanan di òrdu i disiplina pa transporte eskolar.

Reglanan di òrdu i disiplina pa ‘’bùs di skol’’.

1. Kumindá ora drenta i ora baha fo’i bùs.
Muchanan drechi nos ta ku lo mester bai duna Boneiru un futuro na drechi.

2. Wak pa ta na ora kaminda a palabrá ku shofùr di bùs.
Nos lo no haña ta bon ku bùs ta para warda riba otro mucha ku nos sintá den dje siendo nos sí a sòru pa ta trempan. N’ por ku tur mucha ta yega skol lat djis pasobra
ABO ta lat.

3. Nos ta papia usando palabranan bunita i ku respet.
Palabra malu ta ko’i hende malu. Ku palabra malu bo no por logra nada bon.

4. Nos ta kuida pertinensia di otro i evita di skirbi/pinta riba kusinchi ni nada den bùs, ni no destruí nada den bùs di niun otro manera.
Nos mester ta kontentu ku e fasilidat ku nos a haña di wòrdu transportá kasi pòrnada. Si nos destruí nos bùs ta den kiko nos ta bai kore ? Ademas mester respetá propiedat di otro hende.

5. Kada mucha sinta riba nan kurpa pa evitá problema ku otro.
No molestiá otro mucha dor di manera di sinta òf e kosnan ku bo ta hasi.

6. No ta tenta/tèr.
‘’No hasi ku otro loke bo no ke pa otro hasi ku bo !’’

Nos mester keda kòrda ku ta responsabilidat di kada mayor pa nan yunan bai skol i bin kas bèk na tempu i ‘’safe’’. Esaki lo kosta muchu mas tantu plaka si mayornan mes mester paga e transporte serka un bùs partikular. Gobièrnu ta ofresé yudansa den esaki na un preis baratísimo. Laga nos apresiá esaki i duna di nos banda maske ta e pida komportashon. Esun ku no tene nan mes na esaki no ta meresé e servisio aki i ta kore riesgo ku nan no tin mag di kore mas ku bùs pagá dor di gobièrnu.

Nos ta spera di a informá lo sufisiente i ta gradisí mayornan di antemano pa boso koperashon den esaki.

I kòrda semper: Ta huntu so nos por logra. P’esei: Yuda nos yuda bo !

school-bus-bon

This site uses Akismet to reduce spam. Learn how your comment data is processed.

error: Content is protected !!
%d bloggers like this: