Entidat Públiko Boneiru ku monitoreo estrikto di e situashon di aviashon lokal i regional

joselito

Segun diputado: Joselito Statia

Entidat Públiko Boneiru ku monitoreo estrikto di e situashon di aviashon lokal i regional.

Kralendijk, 30 di Yanüari 2017. Kontrario na informashon inkorekto i sin base ku ta keda mandá den medionan di komunikashon lokal dor di oponentenan polítiko, nos gobièrnu ya pa mas ku 4 luna, a bin ta mònitòr e situashon preokupante ku tin ora ta trata trafikashon aéreo entre e islanan ABC.

Esaki debí primeramente na retrasonan di durashon largu i vuelonan ku repentinamente ta keda kanselá i awor aki e situashon finansiero i organisatorio di e kompania Insel Air.
Ta iresponsabel pa laga un situashon di tal índole i ku ta perhudiká nos isla persistí sin drenta den diálogo ku ‘posibel’ partnernan ku por representá un posibel solushon pa Boneiru.

Ta di lamentá ku oponentenan polítiko ku awe no ta karga responsabilidat di gobernashon, ta tuma un tópiko ku ta di vital importansia pa desaroyo ekonómiko di Boneiru i mobilidat di su suidadanonan, hasi polítika partidista i antikuá ku esaki.

Problemanan riba tereno di aviashon riba nos isla, ta di tur tempu. For di ALM, DCA, DAE te ku awor esaki no ta otro. Remarkabel ta, ku no opstante e importansha di e tópiko aki, te na e momentu aki Boneiru no a konosé un maneho pa loke ta trata aviashon.

Tur kos ta kuminsá ku maneho.
Kiko nos ke, na kua nivel, ken ta hasi uso di e fasilidatnan i ku kua frekuensia ken i kon ta kompensá nos hendenan na momentu di retraso ápnòrmal, kiko ta e kantidat di vuelonan ku Boneiru ta deseá pa por brinda un servisio optimal na su suidadanonan i turistanan etc. Ta puntonan ku mester keda ankra den un maneho di aviashon komo parti di un maneho general di transporte públiko.

Nos gobièrnu ta rekonosé balor i nesesidat pa yega na un maneho pa ku e sektor di transporte en general i partikularmente e sup-sekshon di aviashon. Pero banda di e maneho aki ku mester yuda trese klaridat i kontinuidat riba entre otro tereno di aviashon den futuro, nos gobièrnu tin tambe bista riba e situashon desastroso ku ta vislumbrá dado kaso e esfuersonan ku ta hasiendo pa reskatá InselAir, no duna e resultado deseá.

Pa por akshoná riba tèrmino korto dado kaso un situashon indeseabel presentá, mester hasi e preparashonnan nesesario. Den kuadro di e preparashon aki, nos gobièrnu a hiba kombersashon ku kompanianan di aviashon ku ta aktivo den region i riba nos isla pa asina traha riba un plan stratégiko huntu ku gobièrnu di Reino.
Esaki ta importante pa por duna e garantia nesesario di kontinuidat di aviashon riba nos isla asina
evitá ku Boneiru ta keda isolá for di region i restu di mundu, dado kaso e situashonnan no deseabel presentá.

Pues kòmbersashonnan ta tumando lugá pa yega na palabrashonnan konkreto asina Boneiru ta prepará pa kualke eventualidat. Na e manera aki nos ta traha diariamente ku pashon i fervor pa nos pueblo, konforme e responsabilidat ku nos ta karga!

This site uses Akismet to reduce spam. Learn how your comment data is processed.

error: Content is protected !!
%d bloggers like this: