WILLEMSTAD – Riba djamars 30 di aprel a tuma lugá un enkuentro entre Promé Minister Rhuggenaath i Minister di Asuntunan Eksterior, Stef Blok. E enkuentro bilateral akí ta tuma lugá tur aña den márgen di e Konsulta di Relashonnan Eksterior di Reino anual, tené ayera na Sint Maarten.

E konsulta tabatin komo tema sentral e krísis ekonómiko, polítiko i humanitario prekario na Venezuela i e konsekuensianan inmenso ku e situashon insigur kontinuo akí tin pa Kòrsou. E situashon ta desaroyando diariamente i a base di esei Promé Minister i Minister Blok a palabrá pa intensivamente mantené kontakto i keda monitoriá e situashon.

A papia entre otro tokante di e problema di migrashon, hùp humanitario i e situashon rondó di rafinaderia. A para ketu na e konsekuensianan ku e sanshonnan merikano kontra Venezuela i PdVSA tin pa e rafinaderia na Kòrsou i pa e ekonomia aktual di pais. A deliberá ku Minister Blok kon Reino i Hulanda por yuda minimalisá e konsekuensianan pa Kòrsou i ademas yuda den e búskeda pa un operador pa e rafinaderia. Minister Blok i Promé Minister Rhuggenaath huntu a bishitá e rafinaderia i a hiba un kombersashon ku representantenan di Refineria di Kòrsou. Minister Blok tambe tabatin un enkuentro ku Presidente di Parlamentu i representantenan di e Taskforce Índokumentadonan.

A trata diferente aspekto tambe relashoná ku interes- i prioridatnan di Kòrsou komo parti di e temanan ku a diskutí ayera ku e otro paisnan Karibense den Reino. A trata e parti di kolaborashon regional, partisipashon na organisashon- i foronan internashonal i e relashon ku Union Oropeo.

Promé Minister Rhuggenaath ta mira atras na dos dia produktivo i konstruktivo na benefisio di e unidat i koherensia di e maneho di eksterior pa Reino kompleto.