CDM, den boka di pueblo tambe konosí komo “dòk”, ta un NV di gobièrnu. C.D.M. Holding N.V. ta e úniko akshonista di CDM. Pais Kòrsou na su turno tin tur akshon den C.D.M. Holding N.V.

pb-van-curator-huizing-omtrent-faillissement-cdm-1

CDM, den boka di pueblo tambe konosí komo “dòk”, ta un NV di gobièrnu. C.D.M. Holding N.V. ta e úniko akshonista di CDM. Pais Kòrsou na su turno tin tur akshon den C.D.M. Holding N.V.

Riba 1 di febrüari 2017 Damen Shiprepair Curaçao B.V. (Damen), a tuma over e aktividatnan operashonal prinsipal di CDM, esta reparashon i mantenshon di barku, den kuadro di un reaktivashon di e aktividatnan (“doorstart”).

Promé ku e traspaso CDM tabatin mas o ménos 400 trahadó den servisio permanente. Ademas, e kompania tabata hasi uzo di 120 trahadó di forma flèksibel; dependiendo di e kantidat di trabou disponibel, tabata aloká nan. Banda di esaki, e aktividatnan operashonal di CDM tabata krea tambe empleo indirekto supstansial.

Pa basta tempu kaba, promé ku reaktivashon di e aktividatnan, no tabata bayendo bon ku CDM. E volúmen ku e negoshi ta generá tabata mustra bahada i no tabatin sufisiente medio pa bon mantenshon i invershonnan nesesario. CDM no tabata kapas pa kumpli ku su debenan. CDM a keda operashonal te na momentu di e traspaso, pero e kompania tabata premirá ku lo e no por a kontinuá ku su operashonnan na un manera responsabel.

Na 2010 a negoshá ampliamente ku Damen, despues di un búskeda pa yega na posibel kandidatonan pa tuma over e aktividatnan operashonal di Dòk.

Konsiderando loke CDM tabata pasando aden promé ku e traspaso, no tabata sigur ku lo por a restrukturá e aktividatnan di dòk, sin ku e kompania mester bai fayit. Sin embargo, deklará e kompania fayit sin kòntròl lo tabata un senario sumamente no-deseá, entre otro, pa motibu ku esaki lo (por) a kondusí na deskontinuashon di operashonnan, na pèrdida di kupo di trabou i na mas otro daño. Esaki lo no a benefisiá posishon di e akreedornan di CDM tampoko.

Fayit i “pre-pack”
Kon ku bai bin, baimentu fayit ta kondusí hopi bia na fin di un kompania. E kompania ta kai den un lus negativo i por pèrdè kliente i miembro di personal importante debí na pèrdida di konfiansa. Den un situashon asina ta sumamente difísil pa reaktivá e kompania di forma rendabel, si esaki ta deseabel.

P’esei mes tin e nesesidat den práktika pa un fórmula ku ta hasi posibel pa salbaguardiá un reaktivashon lihé di aktividatnan di e kompania. Un “pre-pack” ta ofresé e fórmula aki.

Ora hasi uzo di un “pre-pack” ta solisitá hues pa apuntá un “curator” proponé i un hues komisario proponé. No ta duna publisidat na momentu ku esaki tuma lugá. Ku apuntamentu di e “curator” proponé, no ta bin kambio den e outoridat pa manehá (“beheersbevoegdheid”) ni tampoko e outoridat pa disponé (“beschikkingsbevoegdheid”) di e kompania en kuestion. E tarea di e “curator” proponé ta solamente pa risibí informashon i wak kiko ta pasa den e kompania, forma un opinion tokante kon kosnan ta kanando den e kompania i duna su opinion kaminda ta nesesario. Asina akí e “curator” proponé por studia i prepará pa e posibilidat pa un reaktivashon den tur trankilidat, loke ta hasi ku e “curator” proponé i e hues komisario proponé por optené un bista kompletu tokante esaki promé ku yega na baimentu fayit. Segun ta spera, den un situashon asina nan lo dediká tambe atenshon partikular na interes di e akreedornan i na mantenshon di kupo di trabou. Suponiendo ku e “curator” proponé (i e hues komisario proponé) por haña nan mes den un reaktivashon di e aktividatnan, por prepará esaki den silensio, pa seguidamente, djis despues ku pronunsiá ku e kompania a bai fayit, e “curator” (ya kaba nombrá e ora ei) efektuá e reaktivashon ku pèrmit di e hues komisario (ya kaba nombrá e ora ei).
“Pre-pack” CDM
Pa e motibunan menshoná CDM a solisitá Korte di Promé Instansia di Kòrsou riba 26 di ougùstùs 2016, pa apliká e fórmula di “pre-pack”, pa asina studia i prepará e posibilidatnan i kondishonnan pa un restrukturashon, pa medio di e opshon pa bai fayit.

Basá riba e solisitut aki, Korte a nombra mr. A. Huizing riba 30 di ougùstùs 2016 komo “curator” proponé, den kaso ku CDM mester yega na bai fayit. Segun Korte, CDM a supstansiá sufisientemente den su petishon, ku preparashon pa un eventual baimentu fayit lo por a limitá e daño na esnan enbolbí, entre nan empleadonan di CDM, di tal manera ku esaki ta kompensá pa echo ku e preparashon ta tuma lugá den silensio.

E apuntamentu a konta primeramente te ku 14 di sèptèmber 2016, pero en konekshon ku kumplimentu ku algun kondishon pa e reaktivashon, a prolongá algun biaha.

Na sèptèmber 2016 Damen a yega na un akuerdo di konseshon ku CDM Holding, a base di kua Damen, brevemente bisá, lo hür i operá e astiero ku ta pertenesé na CDM Holding. A yega na e akuerdo aki bou di un seri di kondishon. Algun kondishon esensial pa e reaktivashon tabata ku Damen ta tuma over e personal di CDM pa medio di traspaso di kòntrakt, ya asina e “curator” lo no mester a kibra esakinan, ku ta kanselá e debe serka e akreedornan ku no tin un posishon preferensial mas tantu ku ta posibel i ku gobièrnu i algun akreedor ku tin “claim” supstansial kontra CDM, di sierto manera ta distansiá nan mes for di loke debe nan di forma boluntario.

Riba 1 di febrüari di e aña aki a kumpli ku tur kondishon pa por efektuá e reaktivashon. Ku esaki a konkluí e preparashonnan pa un posibel reaktivashon di e aktividatnan di CDM.

Ku e traspaso manera akordá ku Damen ta salba Dok, e personal ta pasa over i e akreedornan ku no tin un posishon preferensial ta risibí parti di loke debe nan. Si apliká un deklarashon ‘normal’ ku e kompania ta bai fayit, esaki lo no tabata posibel.

Baimentu fayit di CDM
Riba 2 di febrüari 2017 a pronunsiá ku CDM a bai fayit i a nombra e “curator” proponé i e hues komisario proponé formalmente.

Riba e fecha aki e “closing” a tuma lugá i a sigui ku ehekushon di palabrashonnan ku ta kondusí na reaktivashon di e aktividatnan.

Kòrsou, 2 di febrüari 2017
Mr. A. Huizing
(“Curator”)

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: