Nos Pais vs UTS

A petishon general nos ta ripiti awe nochi 10:30 e rueda di prensa Nos Pais Television vs UTS kompletu na kanal 4 i 5 di TDS, 103 na Flow i http://www.nospais.com.
Athunto tambe e vonnis i veredikto di Juez.
Vonnis: Demanda i desishon di Korte den kaso di
Nos Pais Television kontra UTS
Demanda i e loke a okashoná esaki
Nos Pais Television a pidi Korte den un huisio sumario, pa obligá UTS pa reanudá e seňal ku ta permití e kanal di ta den aire. Pa motibu di UTS, Nos Pais Television tabata for di aire for di kumisamentu di janüari 2017.
Entre partidonan ta eksistí un desakuerdo, entre otro tokante di e montante di pago di e konekshon i e suma di e retraso di pago. Konsekuensia di e aktitut di UTS, ku segun Nos Pais Television, ta inhustu i ilegal, ta ku Nos Pais tin simannan largu for di aire, loke ta pone e kanal pèrde plaka den un di e temporadanan di aňa ku mas posibilidat di benta. Komo ku Nos Pais Television no sa si e lo por emití Festival di Tumba, e kanal no por kumpli manera mester ta ku su spònsernan i ta kore riesgo di pèrde varios kontrakt.
Veredikto di Korte
Korte a kondená UTS den su veredikto di 30 di janüari 2017 pa pone Nos Pais Television bek den aire i reanudá tur servisio na e kanal denter di 24 ora despues di risibí prueba di pago kumbini. Den kaso ku esaki no sosodé, UTS lo tin di paga un but.
Ademas, Korte ta prohibí UTS pa stòp di duna servisio na Nos Pais Television mientras ku tin un akuerdo di pago entre e dos partinan i Nos Pais ta kumpli ku su obligashonnan. Den kaso ku UTS kòrta servisio tòg, UTS lo tin di paga un but.
Korte a indika ku e kondena i e prohibishon aki lo ta vigente te ku 31 dezèmber 2017.
E veredikto por wòrdu ehekutá mesora.