UNOPS KU SESHON PA KREA VISHON PA INFRASTRUKTURA DI KÒRSOU KU UN METODO KU YAMA EVIDENCE BASED INFRASTRUCTURE DEVELOPMENT FRAMEWORK

UNOPS KU SESHON PA KREA VISHON PA INFRASTRUKTURA DI KÒRSOU KU UN METODO KU YAMA EVIDENCE BASED INFRASTRUCTURE DEVELOPMENT FRAMEWORK

Willemstad – Manera ya ta konosí, Minister enkargá ku Tráfiko, Transporte i Planifikashon Urbano (mihó konosí komo VVRP), sra. Suzy Camelia-Römer a firma un “Memorandum of Understanding (MoU) ku United Nations Office for Project Services (UNOPS) p’asina asesorá Ministerio di VVRP den diferente trabou di infrastruktura.

Un di e terenonan lo ta e desaroyo di un modelo, ku ta mustra e konekshonnan entre tur tipo di infrastruktura i kon e kambio den unu lo influensiá e otro, un asina yamá “Evidence Based Infrastructure Development Framework” (EBIDF). E modelo aki ta hasi posibel pa desaroyá infrastruktura na un manera mas fuerte i duradero.

Esaki ta enserá no solamente infrastruktura tangibel manera kaya, brùg, edifisio, utilidat etc, pero tambe edukashon, seguridat, salubridat i bienestar en general. E EBIDF ta tene kuenta ku diferente senario den futuro, entre otro kambio di klima i su efektonan, kresementu di poblashon i kambionan den región i e ta yuda nos pa planiá pa prepara pa esakinan. E benefisionan di e uso di e modelo aki ta entre otro ku nos lo tin garantia ku invershonnan lo kumpli ku nan meta, lokual ta hasi mas fasil pa atraé invershonista. Tambe e modelo lo hasi tomo di desishon mas transparente, kita influensia polítiko i alabes sigurá e desaroyo i mehoramento di e país.

E ta ademas un instrumento ku ta garantisá ku e poko rekursonan disponibel ta keda bon invertí. Den e kuadro aki Ministerio di VVRP huntu ku UNOPS a organisá un seshon ku tin komo meta pa gana apoyo serka timnan di maneho di diferente Ministerio i tambe otro stakeholders relevante, pa asina krea den forma integral stipulá un vishon i kuadro di funshonamentu duradero pa e manera ku ta organisá e infrastruktura di Kòrsou..

Pa mas informashon di tur e desaroyonan rondó di Minister Camelia-Römer su akshonnan por bishitá e página di Facebook “Minister Suzy Camelia-Römer”.