KOMUNIKADO KUERPO POLISIAL ARUBA 

PÈRSONA BURACHI.
Informante a deklará ku un mucha muhé, probablemente di 14 aña, lo tabata fuertemente bou di influensha alkohóliko, i kasi no por para mes riba su pianan.
=====
DEKLARASHON DI POLIS.
SCP a dirigí patruya na Farray Shoarme, banda di Sandbar, pa un mucha muhé menor di edat, ku lo tabata fuertemente bou di influensha di alkohòl.
Na e sitio polisnan a mira un mucha muhé sintá na mesa den un posishon slap. 
Un trahadó di Sandbar a aserká polis i a konta ku for di trempan den anochi e mucha muhé tabata ku un grupo di mucha hòmber na Sandbar.
E ta sigui konta ku e grupo di mucha hòmber tabata mand’é trit di rùm i tequila. 
Polisnan a purba papia ku e mucha muhé, pero sin resultado algún.
Pa banda di 01:40, a detené i hib’é mesora na warda di polis Shaba , kaminda lo presenté dilanti un fiskal ouksiliar .
E mucha muhé no tabata na su sano huisio pa por duna su pèrsonalia.
SCP a wòrdu poné na altura di e kaso.
=======================
        DESTRUKSHON.
SCP a dirigí patruya Noord riba djadumingo 5 di febrüari 2017, alrededor di 01:45, durante warda di anochi  na PP, patras di antes Senor Frogs/The Village en konekshon ku un notifikashon tokante destrukshon di un bentana.
Na e sitio, polis a papia ku un vigilante di The Village, kende a detené un hoben, e sospechoso, kende un ratu promé a destruí un bentana di e edifisio.
NJZL a atmití ku el a manda un bòter di serbes kontra e porta di entrada di e edifisio.
Dor di esaki, diferente glas di e porta a kibra.
E vigilante , di nòmber A, a konta polisnan , ku e sospechoso a bini for di Gusto alrededor di 01:30 ku un bòter di serbes i intenshonalmente a mand’é kontra e porta, ku e konsekuensia ya menshoná.
Pa banda di 01:55, polisnan a deten’é i a hib’é warda di polis Shaba, unda pa banda di 02:35 a present’é dilanti fiskal ouksiliar.
A interogá e sospechoso i a enkarselé.
E vigilante a keda di informa e doño den dia.
=======================
      KIEBRO DEN KAS.
Pa banda di  01:35, SCP a dirigí patruya na Schotlandstraat pa un kaso di kiebro.
Na e sitio polisnan a papia ku e dama di nòmber Barbour.
Barbour a deklará ku deskonosínan a bai ku artíkulonan for di su bibienda.
A tuma denunsia pa kaso di ladronisia.
Deskonosínan a fòrsa e bentana i drenta paden.
Nan a bai ku paña i sapatu.
=======================
  SITUASHON SOSPECHOSO

Notifikante a deklará ku un Toyota Yaris blanku a stashoná na altura di Iriam Bar & Restaurant i tabata tur na sanger.
Mas aleu e notifikante ta deklará ku un hòmber lo a sali for di e outo i ku e tambe tabatin sanger riba su paña.
E notifikante ta sigui bisa ku e Toyota Yaris a bai direkshon Sabana Basora.
=====
DEKLARASHON DI POLIS.
Riba 5 di febrüari 2017, alrededor di 94:45, SCP a dirigí patruya na Iriam Bar & Restaurant ku ta keda na altura di retònde di Pos Chiquito pa un situashon sospechoso.
Mas aleu SCP a deklará na patruya ku e bisiña  di e bar menshoná, a bèl CP i a deklará ku pafó di su kurá di kas, el a mira un Toyota Yaris kolor blanku, stashoná.
Segun e notifikante e outo menshoná tabata tur na sanger.
E notifikante a deklará tambe na CP, ku na un dado momentu un hòmber a baha for di e outo menshoná i te asina leu ku e por a mira, e hòmber tambe tabata na sanger.
Despues e hòmber a bolbe drenta outo i a kore bai direkshon Sabana Basora.
Polisnan a bai na e sitio i a kontrolá den bisendario di Iriam Bar & Restaurant i SB i SBN i te asina leu no a topa nada.

CVD i SCP a wòrdu poné na altura di e kaso.
Partikularidat:
E plachi di number di e Toyota Yaris blanku tabata deskonosí.
=======================
              MALTRATO.
Un hòmber a presentá na warda di polis kual  su kara tabata tur na sanger.
El a bisa ku el a wòrdu maltratá na Lekker Bar & Restaurant.
A puntr’é su nòmber.
I el a duna di konosé ku e ta J.V.
En konekshon ku esaki a notifiká pèrsonal di ambulans via SCP.
J.V. tabata fuertemente bou di influensha di bibida alkohóliko i no ke a wòrdu tratá dor di un dòkter.
Solamente e ke a hasi denunsia.
Seguidamente el a sali bai for di warda di polis.
Mas despues e tata di e viktima a presentá na warda i a deklará ku 4 hòmber  a bringa  ku su yu hòmber J.V.
El a bai defendé su yu.
Un kolega a bisa e tata ku e mester hiba su yu hòmber na e Sentro Médiko na SN pa haña tratamentu di dòkter pa despues hasi denunsia na warda di polis Noord.
=======================
        KIEBRO DEN OUTO.
CP a dirigí patruya na altura di Andicuri(baai), pa un kaso di kiebro den outo.
Na e sitio polis a papia ku e hòmber P.
P a deklará na polis, ku el a bai bodyboard ku su amigunan.
Segun P, pa banda di 11:00, el a stashoná su outo di marka Chevrolet, model Celta, kolor pretu, numerá A-63100.
Pa banda di 14:00, el a regresá na su outo.
El a mira ku e grill di kapa di motor a wòrdu di lòs i e kapa di motor tabata habrí.
En konekshon ku esaki, el a bai kontrolá i a mira ku deskonosínan a bai ku e bateria di e outo menshoná.
Algun ratu promé nan a wòrdu aserká dor di 2 hòmber, kendenan a pidi yudansa pa nan outo.
Nan tabatin un Nissan Sentra blou.
Segun e hòmbernan, e Nissan Sentra blou a daña i nan a pidi yudansa pa saka e outo, dor di tou é.
Segun P, e 2 hòmbernan tabata aktua hopi sospechoso.
Ora e tabata pará na su outo, el a mira un di e hòmbernan den un pikòp blanku ku tabata tou e Sentra blou.
P. a deklará ku un di e hòmbernan tabatin man i paña sushi na grís óf zeta.
Riba su motor el a mira markanan di man di grís òf zeta.
Ora e 2 hòmbernan a mira P, e hòmber den e pikòp a kuminsa hasi bochincha ku e motor, dor di keda duna gas.
Diskripshon di e 2 hòmbernan:
Un di e hòmbernan ta delegá, kolor blanku ku tattoo i e otro ta kolor bruin i tambe ku tattoo i su kara tin buraku di pèshi.
Segun CP e number A-18221 ta pèrtenesé na un Nisan Almera, kolor blou.
A tuma denunsia di ladronisia.

CP a wòrdu poné na altura di e kaso.
=======================

A drenta un notifikashon via telefòn na warda di polis, pa un kaso di destrukshon den Figaroastraat.
Na e sitio polisnan a papia ku e notifikante, e dama V, kende a deklará ku e dia ey, alrededor di 06:00, e tabata den kushina, ora ku el a skucha  3 sonido fuerte.
El a bai pa kontrolá kiko tabata pasando.
I el a mira ku deskonosínan a tira piedra i a destruí e glas na parti ost di e kas.
A resultá ku na otro kas den e mesun kaya, esta Figaroastraat, tambe a kometé destrukshon.

A tuma denunsia.
=======================
Riba òrdu di CP, patruya a bai na Cochinilla, unda un pèrsona deskonosí tabata na porta patras di e kas na e adrès menshoná.
Na e sitio, polis a kontrolá rondó di e kas i no a topa ku nada.
Polisnan a papia  ku e habitante, e dama G, kende a deklará ku el a tende un hende bati na porta patras.
Polis a kore den bisendario i a papia ku otro bisiñanan tambe.
Un di e bisiñanan den Cochinilla a bisa ku e no a mira nada.
Un otro bisiña a deklará ku den pasado, e muchanan ku tabata biba den e bario, tabata bati riba su porta pa prèt.
Mas aleu el a sugui bisa ku e muchanan tabata habri kranchi di awa tambe.
El a yega di papia kaba ku e muchanan i nan mayornan tokante esaki.
Mas aleu polis a papia ku un hòmber I, desendiente di Venezuela 
E hòmber tabata ehersé algun trabou riba un kas den Cochinilla.
E ta trahando pa e hòmber doño di e kas ey.
E doño no tabata na kas, di moda ku polisnan por a papia ku n’e.
=======================
A presentá na warda di polis, e hòmber O, pa hasi denunsia tokante su kurá di palu na e adrès, Maria v. Oranjestraat.
Patruya a bai na e sitio i e hòmber O a deklará ku a destruí e kurá di palu di su kas.
Un dama bisiña i otro bisiñanan a deklará ku tabatin  3 hòmber den su kurá.
E ta asumí ku ta e 3 hòmbernan aki lo a destruí su kurá.
O tabata ke haña informashon tokante loke a pasa, ya komo  ku tabatin polis den su kurá.
Tres mucha hòmber deskonosí, bistí na paña kolor skur, ku mùts, tabata e  sospechosonan den e kaya.
E dama bisiña a mira ku e 3 deskonosínan a bula ofer di e muraya di kurá na Oranjestraat.
Polis a kontrolá e kas i no a topa ku e pèrsonanan.
=======================
SCP a dirigí patruya na Pavilla pa un situashon sospechoso.
Na e sitio, polisnan a papia ku un hoben, kende a deklará ku un hòmber a drenta kurá i bati na porta i ku el a hiba sustu i pesey a  bèl polis.
E hoben a sigui deklará ku e hòmber lo a kana pasa algun kas bai.
Polis a kore pasa algun kas i a topa ku un hòmber, kende a deklará ku ta é ta esun ku a bati na porta; dor ku e doño di Pavilla ta laga awa di bérpùt kore subi kaya i ku e awa ta pasa dilanti di su kas, i ku awor sí el a kansa.
Polis a mira ku enbèrdat tabatin un plas di awa ta kore dilanti su porta i ku tabata hole hopi malu.
Polisnan a bai bèk na Pavilla i a splika e hoben ku no ta pèrmití pa laga awa di bérpùt kore.
E no tabata sa ku su tata, kende no tabatey, ta hasiendo esaki, i a paga e mashin.

A pone SCP na altura di e kaso.
=======================

This site uses Akismet to reduce spam. Learn how your comment data is processed.

error: Content is protected !!
%d bloggers like this: