Alabes ta firma kontrato pa inisiá instalashon di lusnan LED Pisina na SDK ta bèk den uso
Alabes ta firma kontrato pa inisiá instalashon di lusnan LED Pisina na SDK ta bèk den uso
Djamars dia 7 di febrüari a tuma lugá un akto ofisial pa pone bèk den uso e pisina na Sentro Deportivo Kòrsou, SDK. Alabes e okashon a sirbi pa firma un akuerdo pa inisiá instalashon di iluminashon di lus ku ta funshoná a base di teknologia LED.
Direktor di FDDK Thakai Doran a habri e enkuentro yamando danki na su invitadonan spesial Minister Presidènt Hensley Koeiman, minister Kenneth Gijsbertha i Minister Zita Jesus Leito. Sr. Doran a ekspresá su orguyo pa por a hasi uso di e instalashon di lus ku ta inovativo i mas ku tur kos ta yuda spar riba gastu di energia. Minister Gijsbertha kende a perkurá pa aloká fondo pa realisá e instalashon nobo di lus tambe a ekspresá su satisfakshon pa e logro. Minister President Hensley Koeiman na su turno a bisa ku e logronan ta di un balor agregá inmenso na realisashon di un parti importante di e akuerdo di gobernashon. “Esaki ta brinda oportunidat pa nos muchanan sigui haña lès di natashon i tambe na nos talentonan pa train i desaroyá.
Tantu Minister Koeiman komo Gijsbertha a ekspresá ku lo bai hasi tur posibel pa tur mucha tin oportunidat pa risibí preparashon pa minimalmente diploma A di landamentu. Mas aleu ámbos minister a ekspresá e deseo pa yega na fondonan pa konstruí un pisina na Bandabou.
Minister di Salubridat Zita Leito a informá ku personal di GNM a guia e proseso pa perkurá ku e awa den e pisina ta kumpli ku tur eksigensia di ku e ta salú pa praktiká natashon.
Sr. Wilfred Bonafacia, direktor di Reda Sosial, organisashon ku a perkurá pa finansiamentu di rekonstrukshon di e pisina, a konta di e retonan ku e proyekto a enserá, pero ku Reda Sosial a hasi ku hopi orguyo i satisfashon.
Siguientemente sr. Doran a firma un akuerdo ku e kompania Industech, representá pa sr. Donardo Vrokijk, pa inisiá ku instalashon di e lusnan LED.
Finalmente sr. Doran a invitá esnan presente pa wak e pomphuis nobo i e beyesa di e pisina kompletamente renobá.
Pa klousurá sr. Doran a yama danki na AquaAir i su tim kompletu ku a perkurá pa e pisina por ta bèk den uso.
