Orashon djadumingu 12 di febrüari 2017

Orashon djadumingu 12 di febrüari 2017

No pensa ku Mi a bin pone un fin na siñansa di e bukinan di lei i di e profetanan, al kontrario Mi a bini pa asina Mi laga nan nifikashon berdadero sali na kla. Mi ta sigurá boso: Promé ku shelu i tera pasa bai, niun lèter chikí ni niun pida di un lèter di e lei lo no pasa bai, promé ku tur kos sosodé. P’esei antó, si un hende no mantené asta un di e mandamentunan di ménos importansia na vigor i e siña otro hende hasi mesun kos, lo e ta di ménos importansia den reino di shelu. Pero esun ku kumpli ku nan i siña otro hende kumpli ku nan, lo e ta importante den reino di shelu. Ami ta bisa boso: Si boso no kumpli ku lei hopi mas mihó ku e fariseo- i dòktornan di lei, boso no ta drenta reino di shelu. Boso a tende ku a bisa boso antepasadonan: “No mata. Mester hiba ken ku kometé asesinato dilanti di korte.” Ma Ami ta bisa boso: Mester hiba tur hende ku rabia ku su ruman dilanti di korte. Es ku yama su ruman kabes duru, mester duna kuenta na sanhedrin, e korte supremo. Es ku yama su ruman idiot mester paga p’esei den kandela di fièrnu. P’esei antó, si bo ta bai hiba bo ofrenda altá i bo kòrda einan ku bo ruman tin algu kontra bo, laga bo ofrenda para dilanti di altá. Bai hasi bon ku bo ruman promé i despues bini bèk bin hasi bo ofrenda. Regla kuenta lihé ku esun ku tin un keho kontra bo, miéntras bo ta na kaminda ainda pa korte, pa e no hiba bo dilanti di hues. Hues lo entregá bo den man di guardia ku lo tira bo den prizòn. Mi ta sigurá bo: Lo bo no sali for di ei den promé ku bo kaba di paga e delaster sèn chikí. Boso a tende ku a bisa: “No kometé adulterio.” Ma Ami ta bisa boso: Ken ku fiha su bista riba un muhé ku deseo, ya a kometé adulterio den su kurason kaba. Si bo wowo drechi pone bo kai den piká, sak’é tira afó. Pasobra mihó bo pèrdè un parti di bo kurpa, ku henter bo kurpa bai tirá den fièrnu. Si bo man drechi pone bo kai den piká, kòrt’é tira afó. Pasobra mihó bo pèrdè un parti di bo kurpa ku henter bo kurpa bai tirá afó den fièrnu. A bisa: “Esun ku divorsiá di su kasá mester dun’é un papel di divorsio.” Ma Ami ta bisa boso: Ken ku divorsiá su señora, si no ta pa motibu di inmoralidat seksual, ta pone su señora kometé adulterio si e señora kasa atrobe. Es ku kasa ku e señora divorsiá tambe ta kometé adulterio. Tambe boso a tende ku a bisa: “No kibra e huramentu ku bo a hasi; kumpli ku bo promesanan na Señor.” Ma Ami ta bisa boso: No hura mes pa ningun motibu. Ni pa shelu, pasobra shelu ta trono di Dios; ni pa tera, pasobra tera ta un banki di pone pia pa Dios; ni pa Herusalèm, pasobra esei ta siudat di e gran rei. No hura pa bo mes kabes; bo no por hasi niun drachi di kabei pretu òf blanku. Laga bo sí ta sí i bo nò ta nò. Tur loke bo pone aserka ta bini di e malbado.
Mateo 5:17‭-‬37

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: