Temporada di bon ambiente i fiesta a drenta na vigor Malesanan Venériko ta den nos komunidat, mester invertí mas den prevenshon pa evitá epidemia

Temporada di bon ambiente i fiesta a drenta na vigor Malesanan Venériko ta den nos komunidat, mester invertí mas den prevenshon pa evitá epidemia

Willemstad- Sigun e presidente di Fundashon Motivá Guia i Protehá, Christopher de Wind e temporada kayente i di bon ambiente e drenta na vigor. Karnaval, un temporada dushi ku semper ta alegrá nos kurason. Remarkabel ta ku nos ta nota tambe ku tin kosnan ménos agradabel ta sosodé den e periodo aki. Lamentablemente nos no ta preparando nos hendenan pa atendé ku esaki. Ta trata di e echo ku malesanan venériko ta keda un problema den nos komunidat. Sifranan di HIV na Kòrsou ta sigui oumentá. Kòrsou no ta trahando riba prevenshon pa ku e malesa aki. Netamente riba esaki ta bon pa nos para ketu. Mester kuminsá dediká mas tempu riba edukashon seksual riba e pais aki pa asina nos yunan, hóbennan i siudadano ta informá debidamente di e situashon aki i tambe e desaroyonan. Na aña 2015 Kòrsou e registrá 86 kaso nan nobo di HIV i entretantu nos a yega for di 1985 te ku awor un kantidat di 1916 kaso registrá na Kòrsou. Esaki ta sifranan di HIV so nos no tin sifranan di otro malesanan venériko.
Últimamente tin algun organisashon / instansha ta traha riba prevenshon pero esaki no ta masha visibel i konsentrá riba e grupo di riesgo manera mester ta pa motibunan finansiero. Gobièrnu mester kuminsá invertí mas den e prevenshon aki i asina pone ku otro gastunan den salubridat ta kuminsá redusí. Kuminsá duna e instansianan ku ta trahando riba malesa venériko mas atenshon pa asina nan por brinda e komunidat mas atenshon.
Tambe mi a señalá ku tin instanshanan entre otro toko chines ta bende prueba di HIV ku por ser usa pa bo sa bo status pa ku e enfermedat aki. Bon pa por revisá esaki i wak kon sigur e método aki ta pa ku por detektá e malesa aki den sistema humano. Loke mester enfoká riba dje tambe ta un sentro di guia pa e pashènt nan aki. Ta bon pa informá e komunidat si esaki sali positivo ki stap e tin ku tuma pa ku esaki. Nos sa ku HIV ketu bai ta un TABÚ grandi den nos komunidat. Pa falta di informashon hopi ta biba ku miedu di enfrentá esaki. Pa e motibu aki ta importante pa eduká nos hendenan ku na momento ku bo hasi e prueba i e sali positivo tin un liña di kontakto òf un instansia pa sostené e persona en kuestion na disponibilidat.
E resultado positivo no ta nifiká ku mundu a kaba, pero mester tin sosten si. Ta bon pa mira kon nos pais ta desaroyá su mes. Awendia bo por yega fásil na un di e pruebanan aki, pero nos no mester lubidá e edukashon mara na e resultadonan aki.
Ku e mensahe aki mi ke deseá pueblo di Kòrsou generalmente un tremendo i dushi temporada di karnaval. Laga nos ta konsiente di nos aktonan, paso kada un akto por tin konsekuensia riba nos pa bida. Miéntras bo ta fiesta hasi esaki konsiente, bo resibu di bida por kambia den frakshon di sekònde. Mi kier hasi un yamada na mandatarionan enkargá ku salubridat i edukashon ta tempu pa uni i invertí den prevenshon na Kòrsou. Mayornan papia ku boso yunan, eduká nan, si bo mes no tin informashon aserka un ku si por yuda bu ku informashon. Dosentenan i lidernan no lubidá ku boso tambe por tin bon influensia riba boso hóbennan. Alfinal hóbennan informá bo mes pa bo ta bon eduká i informá. Kuida, respetá i balorá bo mes.

Felis karnaval
Christopher de Wind
zorgteam-1-copy

This site uses Akismet to reduce spam. Learn how your comment data is processed.

error: Content is protected !!
%d bloggers like this: