Elekshon pa Parlamento dia 28 di aprel.

Elekshon pa Parlamento dia 28 di aprel.
Si ta pa Gerrit Schotte lo no bin elekshon! Eks – griffier di Parlamento señor Frank Hanze sinembargo a splika durante un anochi informativo na sentro di bario Souax ku pa tradishon no sa mòrs ku fecha di elekshon, esei ke men ku una bes ku a stipulá e fecha pa elekshon, no ta kambi’é, sino lo mester ta pa rasonnan imprevisto solamente okashoná pa sirkunstansianan natural, manera pasashi di orkan, teremoto, tsunami etcetera. Esaki te asina leu a keda demostrá i bira tradishon ku na Kòrsou, Aruba i Ulanda ta atendé fecha di elekshon ku altu seriedat i disiplina. Komo tal e ta te asina leu un regla di oro. Pero si pa Kòrsou, Aruba i Ulanda bini un kambio den e tradishon aki di manera ku ta sali for di e punto di bista ku komo ta trata aki di un ‘landsbesluit’, anto kualke gobièrnu nobo simplemente pa buena gana por revoká e fecha di elekshon pa pone un otro fecha pa elekshon of te hasta haña ku lo no mester di elekshon mes, anto nos na Kòrsou pa semper a kibra ku un regla importante, dor di tòrnu na un punto di siguridat ku te asina leu tabata konsiderá komo sagrado! Ta nifiká ku en lo futuro tur gobièrnu por kambia fecha di elekshon, asina ku e sinti e nesesidat ei.
Un otro rason pakiko lo no mester kambia e fecha di elekshon, ta ku finalmente, despues di tur e problema i of konfrontashonnan di bòmbòshi i di desòrdu ku tabatin den nos Parlamento, kuminsando for di 4 di yanüari 2017 te ku e agreshon físiko plenamente den sala di Parlamento dia 23 di febrüari último, a aksentuá un biaha mas e paso tan importante di duna mandato bèk na pueblo!!!! Tabata despues ku parlamentario Jacinta Constancia a agredí parlamentario Giselle Mac William plenamente den e órgano mas haltu di nos demokrasia, poniendo e órgano aki mesora na e nivel mas abou durante hinter su trayektoria. Parlamento en prinsipio mester ta netamente e sitio di enkuentro pa representashon di pueblo ku ta reflehá rèspèt pa hende, kombiná ku un alto grado di inteligensia i kalidat di debate, sostené riba reglanan estrikto di desensia i órden. Ku e último suseso tan repudiabel ku a tuma lugá, mester saka e konklushon ku nos Parlamento ta den un fase di deterioro sin presidente, komo tal ta e mihó momento pa partidonan polítiko i polítikonan na Kòrsou tuma algun akshon serio pa kambia nan imágen negativo. Elekshon lo por sirbi pa kòrta tenshonnan sumamente negativo eksistente den i rondó di Parlamento i of pasifiká un tipo di konflikto ku klaramente a sali for di man. No mester pèrdè tampoko for di bista e morto kruel di e parlamentario Helmin Wiels ku te awe no ta kompletamente resolvé. Un asesinato asina por keda mirá komo un sorto di teror mental ku por wòrdu eksperensiá den forma di intimidashon. Ta na polítikonan pa rekonosé ku un elekshon demokrátiko liber, limpi i sekreto ta e mihó remedi pa kita for di e impase teribel ku polítika i gobernashon di Kòrsou a bin resultá. Una bes ku kosnan a sali asina tantu for di man, no tin sentido pa kontinuá den e mesun lucha pa poder bou di un situashon kaminda ta sigui bòrda riba emoshon, rabia, nesesidat di tuma vengansa, akusashon i denunsianan enormemente serio i inakseptabel. Sigui pleita riba pasashinan den nos leinan, interpretashonnan di den pasado en realidat ta impliká kontinuashon di e biahe ku un trein ku ya a derayá, kita for di rails, kousando problemanan serio di konfiansa i instabilidat den nos sistema. Denunsia serio na Ministerio Públiko di e parlamentario Yael Plet, kende a sali bisa abiertamente di a eksperensiá djaserka intentonan pa kumpr’é ku un suma grandi di plaka pa kibra gobièrnu, miéntras tin di su koleganan ku entre tantu ta demostrando un komportashon un poko dudoso ya ku di formanan ineksplikabel a bin resultá ‘di bòltu’ den e kampo ku un tempu tabata oposishon, pero ku awor ta yama su mes mayoria. Segun e propio doñonan di kurpa tabata kambionan ku nan a hasi, no pa rasonnan ideológiko i of pa defendé e kousa di pueblo, sino puramente pa interes personal. E sirkunstansia aktual ta vislumbrá e nesesidat i urgensia pa salba Kòrsou su sistema demokrátiko for di gara di podernan sukú i tendensioso ku sin rel ta basá riba aktonan satániko manera soborno i otro práktikanan koruptivo. Métodonan di soborno i korupshon ta aktonan perverso ku reperkushonnan devastador pa nos demokrasia tantu awor komo den futuro.