Minister Presidente Koeiman i Minister Gijsbertha ta reuní ku gruponan di interes pa Carifta Games Kòrsou

March 3, 2017 REDAKSHON

WILLEMSTAD – Djaweps 2 mart mainta, riba petishon di Minister Presidente Hensley Koeiman i Minister Kenneth Gijsbertha, a tuma lugá un reunion ku representantenan Stichting Organisatie Atletiek Evenementen (StOA) ku ta e fundashon enkargá ku organisashon di Garifta Games na Kòrsou. Huntu ku StOA, organisashonnan di sosten manera representantenan di e Ministerio di Enseñansa, Siensia, Kultura i Deporte – Ministerio di Finansas – direktor i direktiva di Fundashon Desaroyo Deportivo Kòrsou (FDDK), tambe tabata presente. Meta di e reunion tabata pa duna e ministernan konserní un bista di e prosesonan ku ta andando pa por yega na kulminashon di Carifta Games na Kòrsou.
Direktiva di StOA a duna informashon ámplio riba aspektonan ku ya a tuma lugá di tantu trabounan pa drecha stadion SDK komo e parti mas organisatorio di e evenementoku ta tuma lugá den SDK dia 15, 16 i 17 di aprel próksimo. Tambe StOA i FDDK a duna un bista riba aspektonan ku lo mester tuma lugá den simannan benidero pa finalisá e trabounan pa drecha e fasilidat deportivo SDK di manera ku e weganan por tuma lugá sin problema. Puntonan di atenshon i retonan pa realisashon di e magno evento deportivo akí, a keda bon diskutí ku e ministernan konserní.
Minister Presidente Koeiman huntu ku Minister di Finansas Kenneth Gijsbertha a informá e komishon organisadó (StOA) ku Gobièrnu di Kòrsou lo hasi tur loke ku ta na alkanse pa logra ku e evenemento lo bira eksitoso. A elaborá mas aleu riba diferente punto i proposishon ku a bin na mesa di parti di tantu representantenan di Gobièrnu, komo e komishon organisadó pa engrandesé e proyekto akí.
Minister Presidente Koeiman i Minister Gijsbertha a informá ku lo tuma tur proposishon pa un bon desaroyo di e kompetensia deportivo na konsiderashon i ku lo duna e atenshon nesesario di parti di Gobièrnu na Carifta Games 2017. Pa e motibu akí a plania un reunion ku tur minister durante Konseho di Minister di djarason binidero pa asina tur minister por duna nan aporte, di manera ku Carifta Games 2017, di kua Kòrsou ta huéspet e aña akí, por desaroyá di e mihó forma posibel i bai den historia komo un di esnan mas eksitoso.

_dsc3842