Seminario “Blue Economy: Local Opportunities” dia 9-11 di mart próksimo na UoC

Seminario “Blue Economy: Local Opportunities” dia 9-11 di mart próksimo na UoC

Universidat di Kòrsou i Blue Economy Foundation Curaçao ta bai traha huntu pa desaroyá mas konosementu i hasi mas investigashon tokante posibilidatnan pa Blue Economy na Kòrsou

Blue Economy Curaçao i Universidat di Kòrsou Dr. Moises da Costa Gomez (UoC) a firma un akuerdo di koperashon awe mèrdia pa uni forsa i traha huntu pa stimulá e konsepto di Blue Economy na Kòrsou.

Universidat di Kòrsou i Fundashon Blue Economy Curaçao ta bai kolaborá ku otro pa promové aktividatnan, edukashon i konosementu riba tereno di Blue Economy. Pa medio di e kolaborashon aki studiantenan di UoC por partisipá na investigashonnan i aktividatnan pa atkerí asina mas konosementu i stimulá e espíritu empresarial di un generashon nobo di empresarionan inovativo i un ekonomia sostenibel.

Huntu ku The Living University of the Blue Economy lo uni forsa pa un promé enkuentro práktiko kaminda ta bai papia tokante oportunidatnan lokal di Blue Economy dianan 9-11 di mart 2017. Durante di e seminario lo para ketu na e forsanan ku ta stimulá i e prinsipionan di Ekonomia Blou ku ta kreando kupo di trabou rònt mundu i ku indudablemente por keda apliká aki na Kòrsou.

Riba 9 i 10 di mart e seminario lo trata e posibilidat di realisashon práktiko i ehekushon di proyektonan di Blue Economy na Kòrsou. Empresarionan internashonal “hands-on” lo inspirá i desafiá e públiko presente ku nan produkto- i servisionan i mustra den forma konkreto kon nan a logra trese nan idea riba merkado i kon empresarionan na Kòrsou por saka probecho for di esaki.

Entre e oradonan lo tin tambe un èks studiante di UoC Eudard Michel, ku lo tene un presentashon a base di su tesis ku ela gradua kuné. E lo papia tokante oportunidatnan pa Kòrsou den e area di Blue Economy kaminda lo ilustrá e potensial di e laman ku ta rondoná nos.

Riba djasabra 11 di mart lo tin un di dos evento durante oranan di mainta. Aki lo pone énfasis riba programanan di edukashon i métodonan didáktiko apliká rònt mundu, kaminda muchanan lo familiarisá ku, entre otro siensia, inovashonnan i aplikashonnan práktiko di Blue Ecocomy i desaroyo di inteligensia emoshonal kreando asina relashon entre esakinan ku ta bai mas leu ku lokual ku nan a kustumbrá kuné. E grupo di enfoke ta direktivanan di skol i instanshanan di edukashon. Aki ta trata di enseñansa di futuro ku konseptonan ku ta bai mas leu ku loke nos ta apliká aki na Kòrsou.

This site uses Akismet to reduce spam. Learn how your comment data is processed.

error: Content is protected !!
%d bloggers like this: