Obra Públiko ta investigá buraku grandi riba kaminda di Westpunt
Promé ku drecha e kaya,
Obra Públiko ta investigá buraku grandi riba kaminda di Westpunt
Willemstad – E último áwaseru torensial ku Kòrsou a eksperensiá, a forma un buraku grandi riba kaminda di Westpunt nèt despues di e tùnel di mata i palu di Asunshon. Segun e relato di Obra Públiko ta trata di un tapa di duiker ku a kibra i kai den e duiker. E insidente aki posiblemente a okashoná un daño na e duiker mes tambe. Esaki ta rekerí un investigashon mas profundo.
Otro siman Obra Públiko ta hasi un investigashon mas profundo pa despues laga drecha tur problema ku e insidente aki por a okashoná. Esaki sigur ta un di e motibunan pa kua no por drecha e buraku mesora. Un otro motibu ta ku no tin asfalt disponibel na fábrika di asfalt. Dor ku a hasi shutdown di Refineria Isla, no tin betumen pa por traha asfalt kuné. Betumen ta nesesario pa por traha asfalt.
Obra Públiko ke evitá ku tin ku sera e kaminda pa un temporada largu pa drecha loke mester drecha. Intenshon ta pa hasi e trabou mas lihé posibel, preferibel dentro di un dia pa asina kousa ménos molèster posibel pa e tráfiko ku ta hasi uso di e kaminda spesífiko ei. Esaki ta posibel solamente despues di un bon investigashon i planifikashon.
Mientrastantu a pone barínan oraño pa notifiká usadónan di e kaminda di e peliger. Ta bai pone bòrchi tambe pa avisá outomobilistanan na tempu pa baha velosidat. Ta pidi tur hende ku tin ku hasi uso di e kaminda di Westpunt pa paga bon tinu i tene kuenta ku e buraku aki.