Orashon djaluna 6 di mart 2017

March 6, 2017 REDAKSHON

SEÑOR a ordená Moises pa bisa henter komunidat di Israel lo siguiente: ‘Sea santu, pasobra Ami, SEÑOR boso Dios, ta santu. No hòrta. No gaña otro, ni kohe niun hende kabes abou. No hasi huramentu falsu usando mi nòmber, pa boso no deshonrá mi nòmber. Mi ta SEÑOR, boso Dios. No ranka sanger di boso próhimo ni hòrta nada. No tene pago di un hende ku a traha pa boso te su manisé. No papia palabra malu ku un surdu ni pone un kos den kaminda ku por pone un siegu trompeká. Asina boso ta demostrá ku boso komportashon ku boso ta respetá Mi. Ami ta SEÑOR, boso Dios. Ora boso ta dikta sentensia: no bai na fabor di e pober ni trata e riku mihó pasobra e ta riku. Boso mester dikta sentensia na un manera hustu. No kana hasi redu riba boso próhimo, no lanta falsu testimonio kontra boso próhimo i no hasi nada ku ta pone su bida na peliger. Ami ta SEÑOR. No karga odio den boso kurason kontra ningun ruman, ma sí papia abiertamente ku otro ora algu ta malu, pa boso no ta mes kulpabel kuné. No tuma vengansa ni warda renkor kontra bo paisano. Al kontrario, stima boso próhimo manera boso mes. Ami ta SEÑOR.
Levítiko 19:1‭-‬2‭, ‬11‭-‬18