Heinrich ‘Rich’ Pieter ta bèk!! Ku un kansion promoshonal nobo, titulá: ‘Ta mi Tata’

Heinrich ‘Rich’ Pieter ta bèk!! Ku un kansion promoshonal nobo, titulá: ‘Ta mi Tata’

WILLEMSTAD –
Miéntras un i tur tabata selebrando dianan di fiesta, Deep Texture a traha duru riba un produkshon nobo pa reflehá den e bunita temporada di kuaresma akí.
Deep Texture a aserká e konosido kantante, Heinrich ‘Rich’ Pieter i sin pensa dos biaha Rich a djòin e proyekto. Ta e promé biaha ku e lo interpretá un piesa di e género di Gospel i di kual Rich ta super orguyoso.
Huntu ku e konosido kantante i músiko, Quincy Comenencia, nan a hinka ‘Ta mi Tata’ den un dushi bachi di Reggae Roots, ku lo kapta atenshon di chikitu i grandi ku su ‘flow’.
E kansion ta ilustrá, ku nos ta riku si nos konta nos bendishonnan. E Dios haltu i todopoderoso no solamente a krea nos. E t’ei tambe pa kuida nos manera un berdadero Tata i si nos kere den esaki ku Fe i Gratitut, nos lo mira obranan grandi di su poder i mizerikòrdia den nos bida. Esei te amor di Nos Tata!
Aimée Silvanie i Joäne Martina ta operá bou di e nòmber di Deep Texture. E dos damanan akí tin ya vários komposishon bou di nan nòmber ku bandanan manera: Gio (‘Bo Sunchi’ i ‘Silensioso’), Dreams (‘Bo n’ sa nada’) i tambe Tsunami Aruba (‘Asina Asina’). Gran parti a wòrdu kategorisá komo un hit i a sa di yega tòp unu na diferente radioemisora lokal i internashonal.
Deep Texture ta konosí pa su letranan profundu i poétiko ku ta keda kompañá pa su melodianan di mas ayá. E inspirashon ku e ta haña, ta un grasia di ariba. Su meta ta pa kompartí esaki ku Kòrsou i mundu kompleto. Pa duna danki na e bunita talento akí, Aimée i Joäne a komponé: ‘Ta mi Tata’. Komo testimonio ku tur esaki ta e obra di e Ser Supremo den nan.

‘Ta mi Tata’ lo kuminsá zona for di awe na tur nos radioemisoranan.Tambe hóben- i grandinan por busk’é riba SoundCloud, Youtube òf e página di Facebook di Deep Texture. Sperando ku kada yu di Kòrsou por biba e pensamentu di e bunita kansion ‘Ta mi Tata’.