“SAN NICOLAS DI UN PUEBLO ‘PISCADOR Y KUNUKERO’ PA UN ‘BOOMING OIL TOWN’ FORMA PA MAS CU 50 NACIONALIDAD DI CARIBE Y VECINDARIO !!

BENNY NISBET (PPA):
“SAN NICOLAS DI UN PUEBLO ‘PISCADOR Y KUNUKERO’ PA UN ‘BOOMING OIL TOWN’ FORMA PA MAS CU 50 NACIONALIDAD DI CARIBE Y VECINDARIO !!
…ESEY TA NOS HISTORIA…ESEY TA NOS POTENCIAL !!
San Nicolas…nos ciudad multicultural…. districto mas p’ariba di nos Isla !
Cu un historia rico, un historia cu si e por wordo corectamente proyecta lo contribui enormemente na e producto turistico di nos Isla stima Aruba. Pero pa projecta un historia mester ta consciente di e historia y unda kizas no tin e informacion lo mester acerca e ciudadanonan indica cu por contribui na yena e historia aki.
PPA pa anjas largo ta projecta nos vision pa desaroyo di San Nicolas como ‘San Nicolas, Our Caribbean Town’. Esaki ta basa riba e hecho cu despues di algun epoca di ta un districto relativamente keto cu algun famia cu tabata biba nan bida dedica na agricultura y poco pesca …derrepiente den e epoca colonial a worde indica ‘pa carga nos pais’. PPA ta usa e expression aki pa demonstra e impacto cu a worde treci na San Nicolas primeramente den e epoca di ‘fosfaat’ cu ta acapara e periodo di 1876 pa 1914. Durante e epoca aki a trece un 60 trahador di e islanan Corsow y Bonaire pa traha den e mina di fosfaat na Seroe Colorado y tambe algun europeo di cual algun y nan generacion a keda biba te awe riba nos isla. Durante e epoca aki e ‘belasting’ cu e industria aki tabata paga na e caja colonial a juda financia varios otro isla cu tabata forma parti di ‘Colonia di Corsow’ di e tempo ey.
Despues di e periodo aki …e infrastructura di e haf cu a worde larga atras pa e compania Britanico aki cu a exploita a contribui na e decision di esnan cu a bin busca un haf natural for di unda nan lo por exploita un ‘bunkerstation’ cual cu tempo a bira e refineria conoci como Lago Oil & Transport Company. E desaroyo economico aki a trece un movicion social den Caribe direccion pa San Nicolas, Aruba di otro mundo. Mas cu 50 nacionalidad tabata biba derrepiente banda di otro ‘rond di e refineria’ cu tabata duna nan un bida pa un sesenta anja largo. Despues di su seramento na 1984 San Nicolas y Aruba henter a sinti e effecto economico di esaki. Cu tempo e refineria a worde habri y exploita pa Coastal, El Paso, Valero y awor lo worde transforma den un Upgrader cu lo worde exploita pa Citgo Aruba.
E desaroyo aki ta facil pa expresa den un par di palabra…pero un desaroyo di casi cien anja cu a cambia San Nicolas for di un districto keto y tranquil ….unda un par di famia tabata biba e para bira pa un sesenta anja un ‘booming oil town’ den Caribe !! San Nicolas a literalmente carga nos pais.
SAN NICOLAS OUR CARIBBEAN TOWN ?
Kiko ta e historia cu tin scondi tras di e desaroyo aki ?
Kiko ta e desaroyo social cultural cu e famianan for di rond di Caribe a experiencia ?
Kiko ta tur e custumbernan, musica, cuminda etc cu e famia di otro isla den Caribe a trece cu nan pa San Nicolas, Aruba ?
Cual sitio den San Nicolas a hung un rol importante den curso di e casi cien anja cu a pasa ?
Cual ciudadano nasi na San Nicolas, Aruba pero cu mester a bandona Aruba pa cualkier motibo a logra den exterior riba un variacion di tereno ?
Ta den e historia aki….den e custumbernan aki….ta sinta e potencial enorme cu San Nicolas tin pa worde projecta como un ‘San Nicolas, Our Caribbean Town’ na unda lo tin e reconocimento pa e contribuiccion grandi e ‘famia grandi di San Nicolas’ cu den curso di tempo a biba, a sufri, a contribui pa San Nicolas y Aruba bai dilanti. Sin kita for di e contribuicion di esnan cu tabata biba den otro districto di nos Isla pero tabata bin ‘religiosamente’ tur dia pa bin ejerce nan ofeshi diariamente den e refineria.
Ta e storia aki ta e ‘potencial grandi’ di San Nicolas !! Ta e storia aki lo por duna esnan cu ta biba awe un ‘alternativa’ grandi si e worde bon coordina. Locual a keda demonstra ta cu den ningun di e signaturanan cu a goberna na nos Isla…sigur den e periodo di nos Status Aparte….nan no a realisa y/of hasta e rechasa e aspecto ‘Caribense’ y locual tin den e historia di Aruba te awe.
CARNIVAL…..’OUR CARIBBEAN THING’ ….UN POTENCIAL ENORME !!
E potencial enorme aki na cierto momento ta lanta cabez….y esaki grandemente den e epoca di Carnaval ora cu parti di e herencia di nos grandinan ta worde usa den e fiesta nacional nos Carnaval di Aruba esta ora nos referi na Carnaval, ora nos referi na e ‘origen’ di Calypso, Soca y Roadmarch. Su presencia na Aruba y su origen na San Nicolas ta bisa hopi …….e ta indica cu San Nicolas tin un potencial grandi si projecta su historia den Museum debidamente prepara pa hasi esaki cu sosten di un gobierno consciente di locual lo por worde crea.
PPA kier a referi na e cantidad grandi di tipo di cuminda cu a worde treci aki na Aruba door di esnan cu a bin di e islanan den Caribe ….sin kita afor nos cuminda ‘tipico’ mes. Nos kier referi na un ‘black cake/bolo pretoe’ ..nos kier referi na ‘pick nucle & rice’, na johne’cake & bacalao y mucho mucho mas. Nos kier referi na e contribuicion di un lista largo di isla den Caribe cu su imigrantenan a biba na San Nicolas pa anjas y hopi di nan descendientenan ta biba ainda na Aruba henter…. Den nos tur tin un ‘storia’ pa conta di nos ante pasadonan….y junto e storianan aki ta bira historia ….historia cu por worde projecta debidamente pa nos bishitantenan. Cu tempo e ‘ San Nicolas, Our Caribbean Town’ lo ta un parti di e producto di Aruba den un forma positivo y grandi….esey ta e conviccion di PPA.
Lastimamente San Nicolas ultimo anjanan a entrega su destino politico na hopi di otro districto …unda otro ta determina …Kiko ta bon pa futuro di San Nicolas…y kiko no. PPA ta boga pa San Nicolas su ciudadania mescos cu nos ta boga pa ciudadania di otro districto igual…. Contribui conscientemente mas na desaroyo di den e caso aki e districto di San Nicolas.
Con PPA kier logra esaki ?
1. Compila e historia di San Nicolas y vecindario !!
2. Projectele …riba murayanan, den productonan turistico, den bukinan encuanto e desaroyo grandi y e rold grandi cu San Nicolas tabatatin pa Aruba y den Caribe !!
3. Projectele den Museum cu realmente ta dedica na e historia di San Nicolas etc !!
4. Drecha algun sitio turistico cu ainda por worde salba pa turistanan por bishita !!
5. Prepara nos pueblo pa e alternativa di turismo den e area aki…No mester lubida cu e refineria habri ultimo 25 anja……NO tabatatin un desaroyo economico grandi y nobo na San Nicolas. Pa tal motibo No mester spera di mas di e Upgrader y esaki cu tur respet.
6. E potencial enorme aki …..otro partido politico ta inconsciente di su potencial turistico y historico….PPA lo demonstra lo contrario cu sosten di nos pueblo y lo projecta esaki un viaha mas den ‘NOS AGENDA FOR SAN NICOLAS’.
Epoca di un otro partido den e periodo di nos Status Aparte lo bai sera …otro OCHO anja perdi kizas….a bira tempo pa pueblo duna esnan cu realmente ta consciente di e ‘historia y potencial’ di San Nicolas un mandato mas amplio pa atende cu esaki. PPA ta un partido cu lo dedica atencion na ejecuta e vision’ San Nicolas, Our Caribbean Town’ debidamente.
PPA ta spera cu e articulo aki lo por a contribui na locual por worde jama un apertura den mente di masha hopi ciudadano. Lo bin bek riba e materia aki !

Aruba, 5 di maart 2017 Lider Politico di PPA
BENNY NISBET