Lopende Zaken??? PAR ta bendiendo tur kompania di Gobièrnu bou di e kapa di “Partner Stratégiko” Ta esaki ta e solushon?

Lopende Zaken???
PAR ta bendiendo tur kompania di Gobièrnu bou di e kapa di “Partner Stratégiko”
Ta esaki ta e solushon?

Willemstad, 5 di mart 2017,

Tin un maneho den ehekushon pa den un tempu rèkert bende tur nos kompanianan di Gobièrnu ku kompanianan Hulandes, sin niun klase di orientashon ken lo paga mas òf lo nifiká di bèrdat algu progresivo i positivo pa Kòrsou.

Marriott Hotel:
Na Desèmber 2015 e minister di Partido PAR a disidí di sera Marriott Hotel i laga 250 trahadó pèrdè nan trabou, for di e dia ei nos tin 350 kamber ménos pa Turismo i 1000 miembro di famia sin entrada pa e próksimo 2 añanan

DRY DOCK (DOK):
Na yanüari/febrüari 2016 a start benta di DRY DOCK “DOK” ku kompania DAMEN ku na final di dia a pidi pa e STATUS di E-zone pa asina paga ménos belasting posibel aki na Kòrsou, algu ku DRY DOCK den man di Kòrsou nunka no a pidi. Debí ku mas negoshi wòrdu hasi den DOK mas plaka lo drenta den kaha di Gobièrnu via di belasting pa pueblo di Kòrsou i esaki semper tabata e interes prinsipal.

Ora nos a kere ku lo inyektá kapital fresku i ekspandé aktividatnan kreando mas kupo di trabou, awor ta resultá ku a pidi minister di Ekonomia di PAR pa nan spar sèn pa manda DOK fayit pa asina no tin nodi di paga Kontratistanan lokal i mas ku 500 trahadó e debe ku DOK tin na nan pa trabounan ehersé, konsekuentemente awe nan lo pèrdè 0,50 sèn riba kada 1,00 florin ku DOK debe nan.

INSEL AIR:
A inyektá 33 mion florin di pueblo den un Kompania priva, no tin nada riba papel di un supuesto monto di sèn pendiente pa saka for di Venezuela, tin un Grupo di Sur-Amerika (AVIANCA) pa mas ku un aña ku interes di kumpra e kompania priva, pero a lanta un komishon pa stroba esaki, ademas awor ke pak Insel Air ku aerolinea LIAT ku tin problemanan años kaba pa mantené kabes riba awe.

Na final di dia 600 trahadó su pan ta na peliger for di aña pasa, a inyektá 33 mion florin den Insel Air na lugá di a lanta un fondo pa e trahadónan i pueblo ta pèrdè e 33 mion florin, mas tristu ainda ta ku entre 200 pa 250 trahadó lo bai kas tòg. Gobièrnu i e komishon instalá dor di e Minister di PAR huntu ku e direktor buska for di afó ta blòkiando negoshashon ku Avianca pa pusha LIAT airlines komo e kumpradó.

CURAÇAO PORTS AUTHORITIES (CPA):
Awor ke bende CPA ku un grupo Hulandes, miéntras ku CPA ta e kompania di Gobièrno ku tin tur Monopolio den haf, dor ku e ta e úniko ku tin outoridat i ta kobra pa tur aktividat portuario na tur nos Puertonan di profundidat ku nos pais tin. Esaki miéntras ku e Gobièrnu demishonario ya no tin mayoria ni sosten pa ehekutá niun di e manehonan aki.

Ta esaki ta e solushon………………..?

Frakshon di MFK

klik aki pa dokumento:
https://www.dropbox.com/s/wm2alots3fb6vao/Doc17645_342bV_16-17MinPres-VzSTN20feb17inzLopendezakenministeriesvanverschillendeMinisteries.pdf?dl=0