MOVEMENTU PAS KU KONGRESO EKSITOSO

Kòrsou, 7 di mart 2017.

MOVEMENTU PAS KU KONGRESO EKSITOSO

Djasabra 4 di mart ultimo, MOVEMENTU PAS a tene su pròme kongreso statutario ku titulo “BAN DUNA KÒRSOU BEK NA PUEBLO”. Den e kongreso aki a eligí sr. Everardus “Efi” van de Meent komo presidente nobo di e movementu polítiko.

E Kongreso a kuminsa djasabra mainta tempran i despues ku a determiná ku tabatin kourum i a duna honor i respet na nos himno nashonal, kongresistanan den un esfera hopi positivo a pasa dor di un programa ekstenso ku a kaba te lat den atardi.

Orador di orden di e kongreso tabata sr. Max Elstak ku a duna un elokuente diskurso ku topiko “Demokrasia: Desaroyo di demokrasia di Kòrsou”. Puntonan ku a resaltá den e diskurso aki i e diskushon depsues tabata e aktual influenshá eksagerá di partidonan polítiko (i e oligarkianan nan tras) den gobernashon di nos pais i e nesisidat pa Kòrsou bira soberano den su mes kas.

Despues di merdia a sigui tratamentu di e prome Manifesto di MOVEMENTU PAS, ku mester bira e kompas ideologiko pa e movementu. E dokumento aki keda a finalisá pa Kongreso i pronto lo keda ratifiká di Konseho di Partido.

Finalmente kongresistanan den un elekshon ku a kana kompletamente konforme statutonan di MOVEMENTU PAS a eligí un direktiva nobo ku ta konsistí di e siguiente personanan:
• Presidente: sr. Efi van de Meent
• Vise Presidente: sra. Riglene Gouverneur-Cristina
• Sekretario General: sra. Anuska Carmelia
• Tesorero: sr. Richenel Martina
• Komisarionan: sra. Ruthmila Martina i sr. Anthony Semeleer
• Lider Polítiko: sr. Charles Cooper

Tambe kongreso a instalá e komishonnan statutario, ku ta Komishon Finansiero konsistí pa srs. Urvin Macaay, Juan Benito Bute i Ashley Isidora. Komishon di Apelashon ku e miembronan sr. Edil Poulina, sra. Angeline Rodriguez i sr. Elvy Doran. I Komishon di Honor, Disiplina i Integridad den kua srs. Edwin Gosepa, Dwigno Puriel i Wilfred Coeriel ta integrá.

Den su prome diskurso komo presidente di e organisashon, sr. van de Meent a subrayá e motibu di fundashon i eksistensha di MOVEMENTU PAS i riba e nesesidat pa miembronan demonstrá militansha pa logra hasi Kòrsou mas patriótiko i lográ e adelanto soshal pa nos komunidat.

MOVEMENTU PAS por mira atras riba un eksitoso kongreso ku a kana kompletamente konforme reglanan di e organisashon. Despues di e parti ofishal di e kongreso, miembronan a keda huntu den un ambiente ameno i mas soshal pa sigui papia riba kambionan polítiko ku mester bini pa duna Kòrsou bek na Pueblo.

Atentamente,
Everardus van de Meent Anuska Carmelia
Presidente Sekretario General