Restorant na Caracasbaai ta traha riba renobashon i no riba ampliashon di nan terasa

Restorant na Caracasbaai ta traha riba renobashon i no riba ampliashon di nan terasa

Willemstad – Minister Suzy Camelia-Römer i Domeinbeheer a tuma pasonan nesesario tokante konstrukshon ilegal na un konosido restorant na Caracasbaai. E restorant a purba di amplia nan terasa kantu di laman, pa asina e yega e rant di awa. Korant Amigoe a skirbi den nan komentario di nan edishon di djaluna dia 6 di mart ku a laga e kontratista sigui ku e trabou.

Riba djabièrnè ku a pasa, Domeinbeheer su inspektornan a manda un karta pa e propietario di e restorant kaminda nan a duna instrukshon pa para e trabounan di konstrukshon inmediatamente. Un kontratista tabata traha riba ampliashon di e terasa di e restorant. Despues a splika ku e kontratista si por sigui ku trabou di renobashon di e terasa eksistente, loke si tin pèrmit pe.

Inspekshon di e terasa a mustra ku ta riba e renobashon ei e kontratista a sigui traha i no riba ampliashon di e terasa. Domeinbeheer ta sigui monitòr e trabounan pa sigurá ku no ta pasa riba tereno ilegal i sigur no riba awa ku e terasa. Pa trabounan asina no tin pèrmit i no por haña pèrmit tampoko.