Korte a trata vários kaso di morto den tráfiko i taksi ilegal

Korte a trata vários kaso di morto den tráfiko i taksi ilegal
 
Dia 7 i 9 di mart 2017 a trata den Korte vários kaso di persona sospechá di a kousa un aksidente ku morto. Tabata trata di kasonan dediká na violashon den tráfiko.
Outomobilista E.S. a tende un veredikto di 240 ora di trabou pa komunidat, dos aña prohibishon kondishonal pa kore outo i 2 luna kastigu di prisòn kondishonal. E tabata dia 28 di òktober 2014 envolví den un aksidente di tráfiko riba Cabo Verdeweg na unda el a krusa un liña riba kaya unda ta prohibí di krusa pa yega na un toko. Den e aksidente aki un motosiklista a pèrdè su bida ku tabata biniendo riba kaminda i direpente a hañ’é ku e outo riba su banda di kaminda.
Tambe a trata dos aksidente ku morto na unda un outomobilista i un motosiklista a pèrdè nan bida. Ta trata di un aksidente di 4 di febrüari 2017 riba Weg naar Westpunt i 24 di aprel 2016 riba Schottegatweg-west na altura di Post 5. Den ámbos kaso ta akusá ámbos shofùr di a kore outo bou di influensia di alkohòl. Veredikto den e kasonan aki ta sigui 28 i 30 di mart 2017.
Dia 7 di mart 2017 a trata den Korte un kaso di un sospechoso ku no tabata den poseshon di un pèrmit pa kore taksi, pero si tabata transportá persona den un asina yamá taxi-bus. Esaki potensialmente ta peligroso komo ku e pasaheronan den un kaso asina no ta sigurá ora nan drenta un taksi ilegal. Tambe ta konsiderá esaki komo kita pan for di un otro hende ku si tin un pèrmit pa kore taksi i tin nan kosnan na òrdu. Nan tin ku demonstrá ku nan tin tur kos na òrdu i tin ku paga pa nan pèrmit di taksi. Banda di esei nan tin ku paga a un seguro pa nan pasahero.
Den e kaso kontra sospechoso S.M. Fiskal a hasi un demanda di un but di 750 florin di kual 500 florin kondishonal i dos aña di prueba. E biaha aki Fiskal a tene kuenta ku su karchi di kastigu blanku i e hecho ku e no tin trabou. Den futuro Fiskal ta bai sigui eksihí un but similar, pero sin e parti kondishonal.