Gabinete di Pueblo konformá dor di MFK/KDNT/PS/MP, Braam i Dannawi na kaminda

Gabinete di Pueblo konformá dor di MFK/KDNT/PS/MP, Braam i Dannawi na kaminda

E mayoria di 12 den Parlamento, kier a informá Pueblo di Kòrsou ku tur kos ta indiká ku 17 di mart próksimo (esta djabièrnè awor) e proseso di ‘screening’ ku tin di haber ku formashon di gobièrnu lo ta kla.
Despues di e kaida di gabinete Koeiman e formashon di gobièrnu a eksperensia vários opstákulo ku a okashoná un tardansa innesesario pa start e proseso di formashon i tambe nos eksperensia kon Gabinete Koeiman a violá na vários okashon nos areglo di estado.
Por ehèmpel e echo ku den un forma ilegal Koeiman a retirá dos minister ku tabata gosa di sosten di Parlamento, tambe ministernan di Gabinete Koeiman ku no tin sosten di Parlamento ta sigui funshoná manera nada no a pasa i e echo ku Gabinete Koeiman siendo demishonario a kuminsá trata kasonan ku tin di haber ku maneho a largo plaso i no kasonan koriente. Akinan por menshoná e plan pa bende CPA ku Haf di Rotterdam, aprobashon di plannan di konstrukshon den e ministerio di Hustisia, plannan nobo den infrastruktura i revishon di e eop-regeling. Tambe nos por menshoná e echo ku Gobernadó di un forma ineksplikabel a entrega e petishon pa kuminsá e proseso di ‘screening’ di formador diez (10) dia despues ku e la informa ku esaki lo a start ofisialmente fe 22 di febrüari 2017.
No opstante tur e kontratiemponan aki e Gobièrnu di PUEBLO nobo ya kaba tin mandato di Pueblo i un programa di prioridat deliñá dor di mayoria den Parlamento. Esaki lo ta a base entre otro, di e 10 moshonnan ku Parlamento a aprobá dia 14 di mart último.
En bista di e akontesimentunan a-demokratiko aki dia 17 di mart e koalishon nobo ta bai pone un rueda di prensa 18:00 pa asina duna Pueblo di Kòrsou mas informashon tokante di e gobièrnu nobo.

Mayoria di 12
Kòrsou, 15 di mart 2017

This site uses Akismet to reduce spam. Learn how your comment data is processed.

error: Content is protected !!
%d bloggers like this: