ANTHON CASPERSON:  INFORMASHON TOKANTE DI ” LEKVERLIES” USO NO REGISTRA DI AWA.

Informashon tokante di “lekverlies” Uso no Registra di awa
Mi ta tuma nota ku e dianan aki tin hopi diskushon den medianan soshal tokante e fenomeno di lekverlies aki na Korsou, esta awa ku ta bai perdi den e suministro di awa. Mi ta tuma nota tambe ku diferente argumentonan i konklushonan ta keda ventila, pero ku esakinan no ta kuadra ku e realidat di e kosnan aki. 
Mi ta hiba di opinion ku diskushon of debate riba un punto di prekupashon den komunidat semper ta sano, i mi ta kontentu ku e posibilidatnan ku e medianan soshal ta duna na esaki. Pa mi tambe duna un kontribushon pa ku topiko aki, mi ke informa lo sigiente: 
Lek verlies of ‘uso no registra’……?

Manera ta konosi, aki na Korsou nos ta produsi awa i distribui esaki atrabes di e ret di distribushon na tur konekshon. Total tin mas o menos 69,000 konekshon aki na Korsou, i kada un di e konekshonan aki tin un meter ku ta registra e uso di awa den m3. 
Ta imposibel pa por midi e ‘stand’ di e meternan konvenshonal aki tur riba 1 dia. Pesei Aqualectra ta midi tur luna den 20 dia pa luna e registrashon di e meternan, dor di bai na e lokashon di e meternan i kue e stand di esaki. Basa riba e lokual ku a registra akinan, ta saka e faktura pa e kliente di e periodo ei.
Tambe periodikamente ta midi kuantu awa a Sali for di fabrika i sigur ta midi esaki na tur fin di luna. Di e forma aki bo tin hopi esakto kuantu m3 di awa a Sali fabrika den e periodo.
E kantidat di awa ku a Sali for di fabrika den m3, ta keda kompará ku e som di tur e uso di awa ku a keda midí na e 69,000 konekshonan aki na Korsou, kual a keda registra den e 20 dianan den e luna ei. 
Lo bo ke ferwagt ku e 2 kantidat di awa registra aki, lo ta igual, pero esaki pa diferente motibu no ta e kaso. Na prome luga, dor ku na e fabrika bo ta midi riba 1 dia na fin di luna, pero bo ta midi na e 69,000 konekshonan den 20 dia den 1 luna, ja kaba bo sa ku lo bo haña bo ku diferensia den e midimentu aki. Tambe mester tene kuenta ku e kantidat di awa ku tin den tankinan di awa na kuminsamentu i ku na fin di luna.
E diferensia aki ta keda registra dus den % di e total kantidat di awa ku a Sali fabrika, i e persentahe aki a keda defini komo ‘uso no registra’ di awa i no lekverlies. 
Akinan nos por komprende ku e diferensia entre di kantidat di awa ku a keda produsi i e kantidat di awa ku a keda registra na e konekshonan di kliente i faktura, ta mas ku solamente un perdida tekniko di lek. 
Kon por analisa e fenomeno di ‘uso no registra’….?

Uso no registra di awa, por keda parti den 3 komponente, esta: 
• Uso no registra dor di p.e. flushing di tuberia den kuadro di operashon i mantenshon di e ret di distribushon; 

• Uso no registra dor di p.e. uso ilegal di awa, of diferensianan atministrativo di midi;  

• Uso no registra dor di perdida di awa komo konsekwensia di lek (tuberia ku a kibra etc.).
Kon bo por kalkula e gastunan enbolbi ku uso no registra di awa pa e empresa? 

Si e ‘uso no registra’ di awa ta un konsekuensia di perdida di e awa dor di kiebro di e tuberia, ora ei e empresa a produsi awa, kual e no por faktura na un kliente, dus su perdida ta e kantidat di awa aki, kaminda nos por konklui ku ta awa ku no mester a produsi den e periodo ei. Den e periodo ei dus, e empresa a produsi awa dimas, dus e gastunan ku e empresa tin aki, ta e kantidat di awa ku e la produsi dimas x gastunan di produkshon.  
Si e uso no registra ta un konsekuensia di diferensianan atministrativo of uso ilegal di awa, ora ei e empresa a perde e oportunidat di a fakturá e uso aki. Esaki dus no kiermen ku e empresa lo a produsi dimas, pero mas bien e la perde e oportunidat di a faktura e uso aki, dus e perdida ta e kantidat di awa aki den m3 x e prijs di benta na e kliente pa m3.  
E diferensia den e 2 sistemanan pa kalkula e perdida aki ta grandi, pesei e ta importante pa por kompronde bon prome ta kiko ta e origen di e perdida ku a keda realisa. Pero si bo kalkula e kantidat di perdida aki te ku e norma di perdida ku bo mester ferwagt, ora ei e perdida aki pa m3 ku e empresa ta faktura na e kliente lo ta un frakshon (sen tras di e komma) relativamente chikitu di e prijs pa e konsumido.  
Kuantu e persentahe aki tabata den pasado…?

E persentahe di mas haltu ku a keda registra di e ‘uso no registra’ di awa aki na Korsou tabata na 2004, kual tabata 35.1%. Dor di e maneho integral pa redusi e persentahe aki, esaki a keda redusi na 2010 te na 25.7%. E target tabata pa a jega na 2015 te ku 20%. E target i norma general ku ta aseptabel pa un sistema di distribushon manera nos tin aki na Korsou ta 17%. 
E maneho di e gerensia di e tempu ei tabata pa jega prome na e 20% i despues formula maneho pa redusi e persentahe aki te ku 17%. E persentahe aki tabata stipula riba analisis i rapportnan di plannan di mas aña di e empresa. E sifranan di realisashon ta veridiko. Es decir, ku e persentahe nan aki a keda valida den e kuentanan anual di e empresa di e añanan en kuestion. 
Mas informashon tokante di ‘uso no registra’:

Pa nos por kompronde e fenomeno aki mas miho un par di datos:
• Na Korsou nos ta konsumi mas o menos 9,000,000m3 pa 10,000,000m3 di awa pa aña.

• 70% di e konsumo aki ta dor di klientenan domestiko i 30% ta dor di klientenan komersial.

• Nos tin mas o menos 63,000 kliente domestiko i 6,000 klientenan komersial.

• Total na Korsou nos tin mas o menos 2,400 km di tuberia bouw di tera pa transporta i distribui e awa na tur e klientenan aki.
Renobashon i rekonstrukshon kompleto di ret di awa ta un solushon…?
Ku e kapasidat ku nos tin aki na Korsou di kontratista, nos lo por renoba i rekonstrui un maksimo di 70km pa 80km di e ret di distribushon pa aña. Ku otro palabra si nos lo kier reemplasa tur e tuberianan aki, nos lo por realisa esaki den un periodo di 30 aña. 
Un aserkamentu asina lo no ta logiko ni pagabel, pasombra e gastunan di renobashon kompleto di e ret di distribushon, lo hasi e kostprijs di awa pa m3 hopi mas karu ku e ta awor aki. Tambe no ta tur e perdida di ‘uso no registra di awa’ ta komo konsekuensia di lekkage. Pesei nos mester kompronde i konklui ku e ta ‘onvermijdbaar’ ku e sistema di distribushon di awa aki na Korsou semper lo registra un ‘uso no registra’ den un periodo, i esei den pasado a keda kalkula na un norma di 17%, kual norma tabata e target di e empresa pa realisa. 

 

Kon a logra di redusi e uso no registra aki den pasado te ku 25.7% na 2010 ……..?

Dor di a atende e problematika aki den un forma integral ku tabata konsisti di diferente elemento di maneho. Esakinan tabata:
• Maneho pa redusi preshon di awa den tuberia i minimalisa kiebro di esakinan;

• Redusi e tempu pa reakshona riba kiebro di tuberia i hasi trabounan di reparashon mas lihe ku ta posibel;

• Midi fluho di awa den tuberia kontinuamente i analisa diferensianan i hasi koreskhon den esaki;

• Regularmente analisa fluho di awa den sierto areanan den oranan di anochi;

• Renoba tuberianan den barionan kaminda tin hopi kiebro di e tuberianan aki; 

• Paulatinamente rekonstrui e ret di distribushon di awa di tal forma, ku ta hasi posibel pa por midi fluho di awa kontinuamente;

• Mehora e proseso di registrashon di uso di awa na e konekshonan;

• Kontrola i evita mas tantu ku ta posibel ku tin uso di awa ilegal. 
Na kuminsamentu di tur aña e departamentunan konserni tabata planea e trabounan aki riba menshoná pa keda ehekutá den e periodo nan dilanti. Den un grupo piloto pero tambe den estrikto kooperashon entre e diferente departamentunan tabata monitora i sigi e trabounan i korigi e desaroyo di e trabounan kaminda esaki tabata nesesario. 
Smart metering ta juda pa redusi e ‘uso no registra di awa’……? 

E kontesta akinan ta teoretikamente si. Pero tin mas asuntu ku mester tene kuenta ku ne akinan. Smart metering ta e sistemanan automatisa di meter, ku ta pone ku e empresa por kue tur standen di tur meter simultaneamente. Esaki ta duna dus e opportunidat di elimina e diferensianan di midi entre p.e. e meter na fabrika i e 69,000 meternan na e konekshonan. Tambe e ta duna e oportunidat di midi e fluho di awa den e ret di distribushon mas lihe i sistematikamente i asina detekta kualkier perdida di awa den un area. 
Pero pa por jega asina leuw, ta nesesario pa hasi diferente inbershonan ku ta hopi kuantioso. P.e. mester restruktura e ret di distribushon di awa den sierto konteksto, pa bo por midi e fluho den awa sistematikamente. Tambe mester inberti den tur e meternan na e konekshonan. Mester informa akinan tambe ku e sistemanan aki no ta barata, nos ta papia akinan di inbershonan basta kostoso. E pregunta akinan ta ku un inbershon asina ta hasi nos den e situashon ku nos ta awor aki direktamente mas efisiente, den e sentido ku e kliente lo ripara esaki den su faktura di tur luna. 
E ta bai tambe pa e ‘verantwoording’ di un inbershon asina, teniendo kuenta ku otro inbershonan ku e empresa mester hasi den otro areanan. P.e. imagina bo si awor aki na Korsou nos tin un ‘tekort’ na kapasidat di produsi koriente. Ta kua inbershon lo bo hasi prome…? Bo ta inberti den smart metering of bo ta inberti den mashin di produkshon di koriente adishonal prome….? Korda den e kaso aki, ‘smart metering’ ta depende di un sistema elektriko konfiabel. Awor si nos ta den un situashon kaminda nos konfiablidat di suministro di koriente no ta e lokual ku e mester ta, i nos ‘smart meter system’ ta depende di esaki, nos mes por konklui ora ei, ku podise Korsou no ta kla pa implementa na gran eskala un sistema asina. 
I por ultimo nos mester tene kuenta tambe ku e estado di e teknologia aki. Nos ta na altura ku e tipo di meternan aki ta basta bon desaroyá pa sistemanan di koriente i gas. Akinan mes ja kaba tin hopi diskushon den e merkado over di e konfiabilidat di e sistemanan aki di meter. E pregunta ta ora ei, kuanto risiko nos ke kore pa ku e dependensia di e empresa riba e fushonamentu kontinuo di e tipo di meternan aki…..?  
Mi no ta bisa akinan, ku nos no mester sigi e desaroyo di teknologia mundial. Alkontrario, naturalmente nos mester keda ‘align’ ku kualkier desaroyo, pero nos mester keda ku nos 2 pianan riba tera si, i analisa e asuntunan aki hopi profundo, prome ku nos tuma kualkier desishon al kaso. 
Mester tene kuenta ku e perdida di ‘uso no registra di awa’ den e tarifa di e kliente….?

E kontesta ta si, mester tene kuenta ku esaki. E realidat ekonomiko ta, ku sin e entradanan nesesario inkluso entrada pa kubri e perdida aki, pa e awa ku e empresa ta faktura su klientenan p’e, e empresa no ta genera sufisiente fondo, pa por finansia e trabounan nesesario ku a keda menshona aki riba. P’esei WorldBank a konseha tambe tur gobiernu di paisnan ku ta keda konfronta ku e problema aki, pa nan sorg pa regula nan tarifanan inkluso e perdida aki na prome luga i despues pa atende ku e problema aki. 
Mester traha ganashi riba e benta di awa….?

E kontesta ta si. E ta nesesario. Pa mi splika e ponensia aki pa nos por kompronde lo sigiente. Si tin un kabes di famia ku ta trese 2,000 florin pa luna kas, e famia ei no mester tin e pretenshon ku nan ta husa tur e 2,000 florin ei den 1 luna. Mester spaar sen tambe. Si e famia ke kumpra p.e. un wasmashin, mester spar e sen ei for di e 2,000 florin tur luna pa por kumpra esaki. Hasta si e famia ke bai fia e sen ei serka banko pa kumpra e wasmashin, nan mester paga e aflossing i interes pa esaki tur luna for di 2,000 florin ei, dus mester tene kuenta ku esaki. Ku otro palabra e entrada pa luna di e famia ei, semper mester ta un tiki mas haltu ku e gastunan di luna. E sobra sen di luna ei, ta dus e ganashi di e famia i nan mester di e ganashi pa nan por garantisa nan bibá pa awor i tambe pa den futuro. 
E situashon aki pa un empresa ta meskos. E empresa su gastunan mester ta menos ku su entrada den un periodo, pa e por reserva e sen ei pa e por hasi inbershonan nesesario. Pesei Worldbank a konseha tambe na tur pais pa nan sorru prome pa nan sistema di tarifa pa uso di awa ta na ordu. 
Den e kuadro aki mi ta splika tambe ku e ganashi aki mester ta balansá i aseptabel si. I sigur mester ta asina ku e ganashi aki mester tin un meta predefiní. E empresa su obhetivo no ta pa e paga dividendo for di e ganashi aki, pero mas bien e ta pa e reserva esaki pa e por hasi su inbershonan nesesario i asina garantisa e kontinuidat di e suministro. Transparensia i full disclosure di maneho ta imperativo akinan. 
Prohibi pa lubida……!
Ta prohibi pa lubida akinan ku den pasado gobiernunan di turno kada bes tabata tarda pa a (of keda sin) adapta tarifanan di awa i elektrisidat, pone ku e empresa tabata paga mas tantu na kombestibel pa produsi e produktonan aki, ku e tabata kobra na su klientenan atrabes di su tarifanan. Den aña 2010, e gobiernu di turno a hasta redusi e tarifanan di koriente sin base, pone ku e empresa a realisa perdidanan kuantioso. Ku otro palabra e empresa tabata perde kada bes e oportunidat pa a hasi e ganashi nesesario, manera esaki a kombini ku gobiernu. 
Dor di e sirkumstansia aki, e empresa kada bes atrobe tabata tin di pospone su inbershonan nesesario entre otro, riba e ret di distribushon di awa. Dor di e situashon aki, e empresa tabata kai lat pa realisa su targetnan pa e redukshon di e uso no registra. Anto akinan ta importante pa nos den komunidat kompronde kon nos mes a laga korta nos mes dede dor di baha tarifa aja banda, pero perde e oportunidat di sigi redusi e uso no registra di awa aki. Ku otro palabra nos mes a laga nos mes perde e oportunidat di redusi gastu di e suministrashon i komo tal baha e tarifanan konserni.
Podise por splika akinan tambe ku e asuntu aki a pone ku e gerensia di Aqualectra den 2007 i 2008 mester a hiba su mes gobiernu dilanti Korte pa a obliga gobiernu kumpli ku su palabrashon, pa asina e empresa por a kumpli ku su targets. Ta bon pa informa tambe ku e empresa a haña su rason den tur e 2 kasonan ei den Korte. 
Kontinuidat di maneho ta nesesario:

Si nos komprende e splikashonan aki riba bon, nos por jega na e konklushon ku:
• Maneho di sistemanan pa suministra produktonan di utilidat ta un asuntu bastante komplika;

• E historia di e empresa, ta pone ku hopi bes, no por tin un solushon riba termino korto pa solushona un problema, sin ku esaki lo kosta e konsumido mas;

• Redukshon di e uso no registra di awa ta un proseso di hopi aña;

• No ta asina ku unu por jega den e empresa i realisa e redukshon aki den un periodo kortiku;

• Ta imperativo ku mester tin kontinuidat di maneho pa ku tur e prosesonan di redukshon di e ‘uso no registra’ ku e empresa kier realisa;

• E funshonarionan ku ta responsabel pa e maneho, mester ta bon prepara pa por hasi e trabou aki. E maneho konserni mester keda inisia for di e empresa i akorda dor di su akshonista, esta gobiernu, i no andersom;

• E corporate governance di e empresa mester funshona na ordu. Tur e reglanan konserni tei. Dus no ta e reglanan nos mester konsentra riba dje, pero ta e funshonamentu di e hendenan mester ta na ordu, i einan ta importante ku nos ta kompronde e basiko di e materia pa nos por tin influensia den e efikasia di e suministro;

• Gobiernunan di turno mester funshona tambe a base di e reglanan aki. 

• Ta nesesario ku un i tur ta tene kuenta ku tur e faktornan ku ta relata ku otro, i mester maneha esaki di un forma hustamente pa e faktornan aki no stroba e realisashon di e otro.

• No ta asina ku dor di aplika un teknika, bo ta solushona kualkier problema den e area aki. 

• Mester tene kuenta tambe ku tur e otro areanan di maneho konserni;

• Dor ku hinter e komunidat ta depende di dje, e ta eksigi un proseso di tomo di desishon ku ta largu, pero nesesario;
Por ultimo:

Por ultimo mi ke imforma ku ta importante pa komunidat ta kompronde e problematika aki i e realidat pa ku esaki. Nos mester ta informa tambe kon lo por ataka e problemanan den e kuadro aki i asina nos mes por tin un huisio ku e lokual ku ta keda splika ta kuadra si of no. Nos tur no mester bira eksperto riba e materia aki. Pero nos mester lesa si, Ta bon pa lesa i bo mes saka bo konklushon kiko ta logiko i kiko no. Esei ta mi ophetivo dor di duna e tipo di informashonan aki, pa tur hende mes por saka su mes konklushon.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: