KORTE TA ORDENA MINISTER I GOBERNADOR PA TUMA UN DESISHON RIBA OPHESHONNAN DI AVA AIRWAYS PROME KU 30 DI APREL AWOR

KORTE TA ORDENA MINISTER I GOBERNADOR PA TUMA UN DESISHON RIBA OPHESHONNAN DI AVA AIRWAYS PROME KU 30 DI APREL AWOR

WILLEMSTAD — Ku sumo plaser, AVA Curaçao a tuma nota di e sentensia di Korte pa kasonan atministrativo kontra di èks Minister Suzy Camelia-Romer i Gobernadó di Kòrsou fecha 13 di mart 2017, den kua Korte a duna AVA tur rason den su proseso kontra e èks Minister Suzy Camelia-Romer aki i Gobièrnu.

Manera ta konosí, for di dia 2 di febrüari 2016, AVA a bai den apelashon kontra di tantu èks Minister Suzy Camelia-Romer komo Gobernadó di Kòrsou ku ta igual na Gobièrnu di Kòrsou.

Dia 30 di yanüari ultimo Korte a trata e kaso aki den kua Presidente di Direktiva di AVA Curaçao, Giovanni Atalita, a representá AVA den kompania di su abogado mr. Chester Peterson. Na e okashon ei e dos abogadonan di e èks Minister Suzy Camelia-Romer i Gobièrnu i Gobernadó a atmití ku e èks Minister Suzy Camelia-Romer i Gobièrnu i Gobernadó a neglishá e kaso aki i a primintí ku awor si nos lo a risibí tur e dokumentonan ku èks Minister Suzy Camelia-Romer, kontrali ku bèrdat, tabata pretendé den prensa di a duna AVA kaba.

Inmediatamente despues ku AVA Curaçao a risibí e desishon negativo riba su petishon pa haña e pèrmit nesesario pa por kuminsá ku un kompania di aviashon aki na Kòrsou, AVA Curaçao, mediante di su abogado, a bai den apelashon kontra e desishon negativo aki i tambe, na numeroso okashon, a pidi e èks minister aki pa duna AVA Curaçao tur e dokumentonan konteniendo e supuesto konsehonan ku e ta bisa di a usa pa ninga e petishon di AVA.

Sinembargo, èks Minister Suzy Camelia-Romer intenshonalmente a ninga di duna AVA e dokumentonan aki i a mal informá komunidat ku ya el a duna AVA esakinan miéntras esaki no ta bèrdat. E no a duna AVA Curaçao apsolutamente ningun dokumento te ku dia di awe. Esaki e dos abogadonan di èks Minister Suzy Camelia-Romer i Gobernadó a rekonosé den Korte i tambe nan a konfirmá ku èks Minister Suzy Camelia-Romer i Gobièrnu a neglishá e derechonan di AVA Curaçao i a perhudiká AVA Curaçao dor di tene AVA Curaçao atras.

Awe nos ta mira otro desaster ku e èks Minister Suzy Camelia-Romer aki a okashoná den aviashon na Kòrsou butando ku hopi hende humilde a pèrdè nan pan di kada dia i esun di nan famia.

P’esei AVA Curaçao ta hopi kontentu ku den sentensia di Hues mr. N.M. Martinez ta deklará e apelashon di AVA komo unu ku base i ku tantu Gobernadó di Korsou komo e Minister di VVRP tin te ku dia 30 di aprel awor pa tuma un desishon riba e apelashon di AVA Curaçao ku a keda entregá for di dia 2 di febrüari 2016 kaba.

EKS MINISTER CAMELIA ROMER TA RESPONSABEL

AVA Curaçao ta pone èks Minister Suzy Camelia-Romer kompletamente responsabel pa tur e 250 kuponan di trabou ku a bai pèrdí na Insel Air i tur e kuponan di trabou ku intenshonalmente el a impedí pa AVA Airways krea pa i ofresé n’e yu’i Kòrsou aki na Kòrsou. Poko poko pero sigur nos ta kada dia mas konvensí ku e èks Minister Suzy Camelia-Romer aki tin motibunan òf interesnan di un índole puramente personal pa torpedea tantu e proyekto di AVA Curaçao mes komo esnan ku a inisiá esaki.

Ku mundu di aviashon ta bruá manera e ta na e momentunan aki na Kòrsou, ta danki solamente na Suzy Camelia-Romer, èks Minister di VVRP, ku aki tambe a traha un “balchi” total dje situashon pasobra e no tin e kapasidat nesesario pa por solushoná ningun problema di aviashon i pues ménos e konosementu i kapasidat pa por saka Kòrsou for di kategoria 2 pa hib’é pa kategoria 1 di FAA. Den esaki tambe el a kosta Kòrsou hopi sèn, esta mas di (2) dos mion florin.

Na e momentunan aki AVA Airways tambe tin hopi doló pa e 250 trahadónan di Insel Air ku a pèrdè nan trabou i p’e echo ku e no por ofresé nan un trabou aworakí danki na Suzy Camelia-Romer. Pero Ava Curaçao ta bisa nan kada unu pa no pèrdè speransa. AVA Airways ta na kaminda, ku òf, preferibelmente, sin Suzy Camelia-Romer ku ta kometé desaster tras di desaster.

Por último ta bon pa remarká ku Korte a sentensia gobièrnu di Kòrsou pa paga e gastunan di e abogado di AVA Curaçao i di korte ku sènnan di belasting di pueblo di Kòrsou. Aki tambe mester yama ningun otro hende ku no ta Suzy Camelia-Romer un danki. Un lástima ta ku no ta su sèn, pero sèn di pueblo di Korsou.

Atentamente

Giovanni Atalita
Presidente AVA Airways