Ta pretendé di ekskluí esnan di ménos rekurso. Pero,..… es ku sembra bientu ta kosecha horkan! Pobresa ta e motibu prinsipal pa mal prestashon na skol.

Ta pretendé di ekskluí esnan di ménos rekurso. Pero,..… es ku sembra bientu ta kosecha horkan! Pobresa ta e motibu prinsipal pa mal prestashon na skol.
No ta asina asina tin tantu violensia i gran kantidat di dropout. Según datonan statistiko ta 25% di nos komunidat ta biba un nivel di bida bou di e liña di pobresa. Nos ta papiando aki di un grupo konsiderabel ku no por kumpli ku nan nesesidatnan básiko pa por biba. Aki mi ta referí na skarsedat òf falta di kuminda, konekshon di awa i koriente, bibienda, òf otro nesesidatnan básiko. Si nos ke akshoná pa salba e muchanan salí for di famianan ménos pudiente, si nos ke duna un man pa kibra e sirkulo di pobresa akí, nos mester frena efektonan di pobresa riba enseñansa. Kua ta e efektonan di pobresa? Kondishonnan no faborabel pa studia. E kondishonnan no faborabel por ta múltiple. Pensa riba e mucha ku no tin koriente na kas, ku no tin kòmpiuter o konekshon di Internèt, pensa riba e mucha ku no tin un mesa na kas, pensa riba e mayor ku ta asina okupá buskando su pan di kada dia ku no ta motivá su yu studia, òf e mayor ku no ta den kondishon di por yuda su yu ku su tareanan di kas. Problemanan sosial emoshonal. E mucha sali for di kasnan ménos prudente ta okupá su mes ku prekupashonnan ku no ta pertenesé na e mundu di mucha. E ta puntra su mes por ehèmpel si mèrdia lo tin algu di kome òf kon lo e hasi pa e kome. Ta proba ku hopi biaha e situashon den e kasnan aki ta produsí hopi strès ku ta hiba na violensia òf abuzu den kasnan. Situashon finansiero. Apesar ku nos tin enseñansa liber nos no por ekskluí ku tin gastunan di transporte,unifòrm, mester di laptop, material ku mester print etc. Mal nutrishon. Ta masha simpel pa splika ku un mucha ku hamber no por konsentrá di forma optimal. E mucha k upa motibunan finansiero no ta kome balansa, trempan òf lat lo tin problema ku su salu. Problema ku salu segun e rapòrt di UNICF na 2013 ta e motibu prinsipal pa kual muchanan ta falta skol.
Pues pa nos frena e efektonan di pobresa aki, pa ta konkreto nos mester konsiderá e lo siguiente.
Ban involukrá mayornan mas den e proseso edukashonal di nan yunan. Mester sostené tur mucha espesialmente esnan sali for di kasnan pober riba tereno sosial emoshonal. Ban sostené e mayornan di ménos rekurso ku finansiamentu pa gastunan di estudio di nan yunan. Ban ofresé nos muchanan un programa amplio di formashon. Un programa di skol alargá ku ta konsistí di formashon sosial, emoshonal, spiritual, deportivo i artístiko. Nos muchanan ta meresé un nutrishon balansa, di manera ku nan por funshoná optimal. Si nos enkargá pa un dieta balansa, i sufisiente praktiká di deporte den e programa eskolar, nos por ta sigur ku nos lo mira un bahada den gastunan di salubridat pa motibu ku nos a ofresé nos muchanan un dieta balansa. Solamente si nos frena e efektonan aki nos lo logra kibra e sirkulo di pobresa riba nos pais.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: