Advertisements

EKSPOSISHON DI ORKIDIA KU VARENS

EKSPOSISHON DI ORKIDIA KU VARENS
Curaçao Orchid Club huntu ku Asosiashon Pterophyta a djòin pa trese un eksposishon, úniko den su forma, akí na Kòrsou. Riba e dianan 1 ku 2 di aprel 2017 lo ta konvertí den arte di naturalesa ku un kantidat enorme di orkidia i varens.

Aki na Kòrsou durante henter aña nos tin un klima tropikal. E klima akí ta faboresé nos hopi biaha ora ta trata kuido di mata. Esaki ta duna oportunidat pa sigur den temporada di awaseru ku matanan manera orkidia i varens por desaroyá i bira bunita. Kisas ainda hopi hende no sa, pero riba nos pais nos tin un kantidat enorme di orkidia i varens. Den basta kurá orkidia i varens ta forma parti esensial di flora i founa. Sigur esnan ku krese i bira una beyesa den nos klima tropikal kombiná ku un tiki bientu, solo i sombra.

E eksposishon ta karga e nòmber ‘Arte di Naturalesa’. Durante e dianan aki lo bai transformá e kurá di Museo di Kòrsou na Otrobanda den un arte di naturalesa. Lo bai show tur loke ku na Kòrsou nos tin tantu na orkidia komo na varens. Tur esaki den aire habrí i dominante den naturalesa.
Miembronan di tur dos e klupnan a prepará dos dia di eksposishon ekstenso. Pa esnan ku nunka a mira un dje matanan mas biew di mundu ku ta varens ni mira kolónan eksótiko dje flornan di orkidia lo bai tin oportunidat pa bo será konosí ku nan mas di aserka. Lo tin varens i orkidia di tur parti di mundu. Nos hendenan lokal mes ku tin hopi konosementu den orkidia i varens lo duna charla den oranan di mainta i atardi den Snipzaal. E charlanan lo pone atenshon riba historia, kuido, identifikashon i struktura di varens i orkidia. Naturalmente lo bai tin oportunidat pa kumpra varens i orkidia na preis di famia.
Curaçao Orchid Club huntu ku Asosiashon Pterophyta ta invitá pueblo di Kòrsou kompleto pa bin bishitá nos riba djasabra 1 di aprel i djadumingu 2 di aprel di 9or di mainta te ku 6or di atardi den kurá di Museo di Kòrsou. Bin atmirá i eksplorá den Arte di Naturalesa. Entrada ta solamente 5 florin.

Pa mas informashon por aserká miembronan di klup di orkidia i varen. Tambe por bèl òf app na 5201719 i 5217676 pa mas detaye di e eksposishon.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: