Invitashon pa asisti na nos manifestashon

Pueblo ta den un tenshon enorme pa loke ta trata e asuntu ku elekshon ta sigui si òf nò. Basta hende ta aserká nos ku nan preokupashon relashoná ku esaki i ta den kuadro akí, Komishon di Akshon Wishi / Marchena i Besindario ta asumí su responsabilidat, pa hasi un yamada urgente na tur habitante i tur esnan ku ta sostené pa elekshon di dia 28 di aprel tuma lugá, pa asistí na un manifestashon pasífiko, pa demostrá ku nos no ta di akuerdo pa para e elekshon i pa manda un señal hopi kla pa tene kuenta ku nos posishon.
Fecha : Djamars 28 di mart 2017
Ora : 17.00 pa 19.00
Lugá : Den kurason di Marchena, na Schottegatweg – West.

Nos ta respetá tur grupo i pèrsona ku nan opinion, pasombra esei ta nan derecho legítimo. E mesun derecho akí ta konta pa nos tambe i nos ta spera ku tur hende lo respetá esaki.
Dirigentenan di Komishon di Akshon di Wishi/Marchena i Besindario, ku hopi atenshon a sigui e desaroyonan i ta disponé di e konosimentu di nos Areglo di Estado, reglamentu di òrden, reglamentu i outorisashon di Gobernadó i tambe e prosedimentunan di korte europeo na Strassbourg.

Pa evitá mas konfushon i tenshon den pueblo, dirigentenan di bario, a disidí pa sali dilanti pa ekspresá ku alma i kurpa nos sosten pa elekshon di 28 di aprel 2017 tuma lugá. Kòrsou no ta bon sirbí pa nos keda para riba un asuntu, pa sigui konfundí pueblo. Si nos ta serio i sinsero i ku nos ta pretendé na bisa, ku nos ta traha pa pueblo, awor ta e momento oportuno pa duna pueblo un biaha mas e oportunidat p’e skohe su bèrdadero representantenan.

Mester kuminsá pensa pa traha riba e kambionan pa konstruí un demokrasia real i bib’e tambe, si ta pretendé ku Kòrsou mester di dje. E yamada pa e manifestashon ta bai pa tur simpatisante, partidonan den kontienda elektoral i tur esnan ku ta konsiderá nan mes liber pa sostené i konstruí un Kòrsou hustu, progresivo i un desaroyo duradero pa nos tur.

E plataforma di sosten ta habrí, kaminda esnan ku ke dirigí palabra ta mas ku bon biní, pero mester kumpli ku nos reglanan di rèspèt i desensia. E manifestashon no ta pa midi forsa i kompetí ku ningun grupo òf pèrsona. Tampoko pa midi kantidat, manera semper ta husga organisadónan di kualkier manifestashon. Nos manifestashon, sea ku hopi òf tiki hende, ta pa hasi uso di nos derecho i libertat sagrado, pa no na radio, ni na televishon, pero den pleno kaya, kaminda pueblo ta trafiká i tin aseso liber, pa nan por yega sin ningun tipo di temor, pero ku kurashi bin ekspresá nan sentimentunan.
Esnan ku ta sinti ku nan por bini ku nan bandera, banderin i bòrchinan di apoyo i sosten ta bon biní. Den Marchena nos no tin miedu di nada i di ningun hende, pasombra nada no por pasa. Organisadónan di e manifestashon a aserká kuerpo polisial pa e aktividat akí i ta keda responsabel pa tur kos kana na òrdu sin desòrdu.

Atentamente,
Kenneth E.Valpoort

This site uses Akismet to reduce spam. Learn how your comment data is processed.

%d bloggers like this: